Monthly Archives: Feb 2020


LYDENSTYD HET BEGIN

Die Lydenstyd (Lent) het amptelik gister begin met Aswoensdag. Komende Sondag is ons by die tweede Lydensondag. Jesus se versoeking in die woestyn vir 40 dae dien as agtergrond en patroon vir die Lydenstyd. Dit duur vir sewe weke tot en met Goeie Vrydag, waar ons Jesus se kruisdood gedenk. Op Paassondag vier ons Jesus se opstanding uit die dood en die nuwe lewe wat Hy vir ons daardeur moontlik maak.

Tydens die Lydenstyd word sewe kerse doodgeblaas, elke sondag ‘n kers. Die simboliek is om geleidelik van lig na donker te beweeg namate die herdenking van Jesus se kruisdood nader kom. Op Goeie Vrydag word die laaste kers geblus en is daar donkerte en stilte. Op Paassondag word al die kerse weer aangesteek, asook die groot Christuskers as viering van Jesus se opstanding uit die dood.

Met die oog op die begin van die Lydenstyd, kyk ons na die volgende gedig van Jean M. Watt met die titel: Lent

Lent is a tree without blossom, without leaf

Barer than blackthorn in its winter sleep,

All unadorned. Unlike Christmas which decrees

The setting-up, the dressing-up of trees,

Lent is a taking down, a stripping bare,

A starkness after all has been withdrawn

Of surplus and superfluous,

Leaving no hiding place, only an emptiness

Between black branches, a most precious space

Before the leaf, before the time of flowers;

Lest we should see only the leaf, the flower,

Lest we should miss the stars.

Watt se gedig vergelyk die Lydenstyd met ‘n boom wat al sy blare en blomme verloor het. Dit is ‘n tyd om onsself te stroop van die geraas van ons lewe en om ons bewussyn weg te draai van die dinge wat ons lewe, tyd en gedagtes op ongesonde maniere opneem. Daar is iets dor rondom ‘n kaal boom in die winter. Dalk verkies jy om die lentebloeisels te sien, of die groenigheid van die somer, of die goue blare van herfs. Tog, kry ons ‘n ander beeld van dorheid wanneer ons met dankbaarheid van die groter prentjie bewus raak – selfs bewus raak van die moontlikheid om sterre deur leë takke raak te sien. Lent is ‘n tyd wanneer ons kies om verby die dinge te kyk wat ons lewe volmaak, verby gemak en plesier en sekuriteit sodat ons die diepte van ‘n vervulde lewe kan ontdek. Hier is ‘n geleentheid om ons lewe te stroop na die basiese, die nodige, om die simplistiese te geniet, te fokus op die betekenis van lewe en weg te draai van dít wat ons innerlike wêreld – ons siel versmoor. Stap saam en beleef die Lydenstyd op ‘n nuwe manier!


SONDER LIEFDE IS DIT TYDMORS

1 Kor 13:1 “Al praat ek die tale van mense en engele, maar ek geen liefde nie, het ek ‘n stuk klinkende metaal, ‘n galmende simbaal geword.”

Liefde is ons grootste doel hier op aarde. Ons is hier geplaas om te leer om God en ander lief te hê. Paulus beskryf aan ons in 1 Kor 13 waarom die liefde die belangrikste waarde is.

  • Sonder liefde is alles wat jy sê ondoeltreffend. Woorde sonder liefde is net geraas. Mense verwerp liefdelose woorde, maar hulle sit regop, luister en reageer op woorde wat in liefde uitgespreek word.
  • Sonder liefde is alles wat jy weet onvolledig. 1 Kor 13:2 “Al het ek die gawe van profesie en ken ek al die geheimenisse en besit ek al die kennis….maar ek het geen liefde nie, dan is ek niks.”  Die wêreld ontplof van al die informasie en kennis. Tog word baie van ons mees basiese probleme nie opgelos nie, want die wêreld soek nie na meer kennis nie, maar na liefde.
  • Sonder liefde is alles wat ek glo onvoldoende. 1 Kor 13:2 “al het ek al die geloof om berge te versit, maar ek het geen liefde nie, dan is ek niks.” Baie mense het die wanpersepsie dat christenskap net gaan oor die glo van sekere waarhede en leerstellinge. Die vraag is egter: het jy Jesus lief? Besef jy dat Hy jou liefhet? Christenskap gaan daaroor dat ek Christus se liefde sal ervaar – en om te leer om soos Hy lief te hê.
  • Sonder liefde is alles wat jy gee betekenisloos. 1 Kor 13:3 “Al deel ek al wat ek het aan ander uit…maar ek het geen liefde nie, baat dit my niks.” Daar is allerhande motiveringe waarom mense gee, soos ‘n gevoel van verpligting, prestige of skuld. Net omdat jy gee beteken nie dat jy dit doen in liefde nie. Jy kan gee sonder om lief te hê, maar jy kan nie liefhê sonder om te gee nie.
  • Sonder liefde is alles wat jy bereik onvoldoende. 1 Kor 13:3 “al gee ek my liggaam prys om my daarop te kan roem, maar ek het geen liefde nie, baat dit my niks.” Jy kan baie prestasies behaal het in hierdie lewe. Jy kan selfs jou lewe offer vir die Koninkryk van God, maar sonder liefde is dit ‘n vermorste poging. Jy kan die gawe hê om welsprekend te wees, die kennis van ‘n genie, die geloof van ‘n wonderwerker, die vrygewigheid van ‘n filantroop, die toewyding van ‘n martelaar – maar as jy nie liefde het nie, tel dit absoluut niks. Die goeie nuus is egter – jy kan ander liefhê omdat God jou eerste liefgehad het. Soos wat jy leef binne sy liefde sal Hy jou help om ander lief te hê. Wanneer jy nader aan Hom beweeg, sal jou vermoë om lief te hê toeneem. Hy maak dit moontlik om hierdie roeping tot liefde vir ander uit te leef.

BLY EMOSIONEEL GESOND

Ek en jy het ook ‘n innerlike lewe – dit gaan oor alles wat ons dink en voel in ons binneste. Soms wys ons dit mense – soms steek ons dit weg. Meestal wys dit in ons optrede, ons gesindheid, ons woorde en dade. Emosies is die barometer van die siel. Dit wys vir ons hoe dit hier binne gaan. Dis belangrik om binnekant gesond te bly, selfs te midde van turbulensie. Daarom is dit so belangrik om ons gedagtes doelbewus te rig op die goeie dinge, die teenwoordigheid, liefde en gawes van God, sy Woord, sy sorg! Wanneer ons op dit alles fokus, kom die emosies ook naderhand in lyn met die gedagtes.

Spr 17:22 sê: “ ’n Vrolike mens is ‘n gesonde mens, ‘n neerslagtige mens raak uitgeput.” Die GNT vertaling stel dit so: “Being cheerful keeps you healthy”.

Jou liggaam sal baie gou vir jou laat weet wanneer jy fisies herlaai moet word. Jou maag grom – dit is tyd vir eet. Jou ooglede raak swaar – dis tyd vir slaap. Ons kyk egter dikwels die ander tekens mis wat vir ons sê dat ons ‘n emosionele herlaai nodig het: ‘n gevoel van oorweldiging, ‘n kort lont, ‘n ongeduldige uitbarsting of om mense te vermy… Jy het geen begeerte om mense lief te hê wanneer jou emosionele tenk laag is nie. Om aan te hou om die oorvloedige lewe te leef, ‘n lewe van vryheid en liefde is dit belangrik om jou emosionele tenk vol te hou. Hoe doen mens dit?

Beplan vir ‘n bietjie alleentyd. Jesus het dit gereeld gedoen – Hy het onttrek aan die skares om emosioneel te herlaai. Lees maar Mrk 6:31 in hierdie verband. Mense wat altyd beskikbaar is, is nooit volledig beskikbaar nie, tensy hulle tyd maak om te rus.

Probeer vasstel watter aktiwiteite in jou lewe vir jou nuwe energie verskaf – wat is die dinge wat jou batterye herlaai. Dit wissel van mens tot mens want ons is verskillend “bedraad”. Dalk is dit ‘n stokperdjie, om met jou hande iets te doen, ‘n sport, ‘n kunsaktiwiteit, ‘n speletjie, leeswerk, musiek luister, stap of net stilwees êrens. Maak tyd hiervoor in jou besige skedule. Kuier kan ook baie terapeties wees vir sommige mense. Matt 11:19 verwys na Jesus wat te midde van ‘n baie besige lewe geëet en gedrink het. Hy het sover Hy kon sy lewe op aarde geniet. Die Fariseërs het selfs na Hom verwys as ‘n vraat en ‘n wynsuiper…! Ons is nie geskep om die hele tyd uitgeput te wees nie.

Ontwikkel die gewoonte van lag. Wanneer jy lag vermeerder die getal T-selle in jou liggaam. Dit verhoog jou immuniteit en stel endorfiene vry in jou brein. Om te lag is goed vir jou gesondheid. So begin jy die lewe meer geniet, maar dit help jou ook om ander goed lief te hê.


‘N GROOT VOORBEELD OF ‘N GROOT ERFLATING

Pred 5:14: “ Self gaan hy kaal uit die wêreld uit soos hy daarin gekom het. Hy kan niks met hom saamneem vir al sy inspanning nie.”

Het jy al ooit gewonder, na die dood van ‘n ryk persoon: hoeveel het hy of sy aan  hul familie agtergelaat. Soms lees ons van sulke erflatings in die koerante. Kan ek vir jou ‘n geheim vertel? Hulle het dit álles agtergelaat!

As ek geen krediet gaan ontvang in die hemel vir al die skatte wat ek hier op die aarde bymekaar gemaak het nie, wat is dan die doel om dit alles so te versamel hier op die aarde?

Sommige oordeel dat hulle al hul rykdomme aan hul kinders sal agterlaat. Meeste mense doen dit ook so. Dit help om ons kinders ‘n goeie hupstoot in die lewe te gee. Baie kinders het groot waardering daarvoor en tree op verantwoordelike wyse op met daardie erflating.  Studies het egter ook aangetoon dat , in meeste van gevalle het groot oorgeërfde rykdomme groter skade as goed gedoen aan die volgende generasie.  Inc tydskrif het ‘n paar jaar gelede ‘n artikel gepubliseer rondom die vraag of ouers al hul geld moet oorplaas na die volgende generasie. Hulle het kinders van entrepreneurs ondervra. Meeste van hulle het geantwoord dat hulle dit sou verkies dat hul ouers aan hulle eerder die kennis van hoe om geld te bekom, moes agterlaat,  as die geld. Hulle wou, met ander woorde, nie die resultate van hul ouers se arbeid gehad het nie, maar die voorbeeld van hul arbeid. Hulle het verstaan dat mens nie kan waardeer waarvoor jy nie gewerk het nie. Oorgeërfde rykdom het ‘n geneigdheid om onverantwoordelikheid te kweek. Kyk maar hoe reageer mense wat groot bedrae geld gewen het. Meeste kan dit glad nie hanteer nie want hulle het nie daarvoor gewerk nie.

Koning Salomo het groot rykdomme aan sy kinders nagelaat. Hy staan nogal uit as ‘n man in die geskiedenis wat baie rykdomme versamel het. Hy het alles aan sy seun nagelaat – sy rykdomme, sy heerskappy, sy koningskap, sy mag. Dit het egter sy seun se lewe geruïneer. Rehabeam was ‘n morele mislukking wat nie dit kon bestuur waarvoor hy nie gewerk het nie. Dit laat mens nogal dink!

Dis nie ‘n sonde om geld te maak nie. Die vraag is egter, wat gaan ek met dit alles maak? Hoe gaan ek dit bestuur en wat gebeur daarmee nadat ek nie meer daar is nie. Hierdie is kritiese vrae vir ons. Dit blyk nie goed te wees om rykdomme op te gaar om dit aan ander gee wat dit nie sal kan hanteer nie. Leer eerder om jou geld nou met wysheid en oorleg te bestuur. Fokus daarop om die geld wat jy het (of dit baie of min is), aan te wend om mense in die hemel te kry! Laat vir jou nageslag ‘n voorbeeld na van vrygewigheid. So sal jy ‘n ewige belegging maak wat vir altyd van waarde sal wees.