Monthly Archives: Mar 2020


Jy word vasgehou!

Die afgelope paar weke is die wêreld behoorlik omgekeer. Ons probeer uitpluis hoe ons die volgende drie weke gaan hanteer. Hoe sal ons sosiale afstand kan handhaaf? Wat gaan die impak op ons almal wees – ons was nog nie in so ‘n situasie nie. Dit is nou ons beurt in Suid-Afrika. Nie een van ons is opgelei of regtig presies voorbereid om so iets te hanteer nie. Ons leraars het ook nog nie bedien in so ‘n uitsonderlike tyd nie. Vrees is oral in die lug – almal is op hete kole, daar is ‘n swanger ongemak by ons. Mense vlieg mekaar in by die rye waar hulle in toue staan. Mense is ongeduldig en jaag rond in hul motors…ons wêreld is omgekeer.
In sulke tye moet ons vashou aan waarhede wat nooit verander nie. In krisitye moet ons terugkeer na die basiese beginsels. Die feite moet voorkeur geniet voordat ons begin aksie neem.

  1. Moenie alles glo wat jy hoor of lees nie.
    Dis nie alles waar wat jy hoor nie. Nie almal op die internet, televisie of sosiale media weet waarvan hulle praat nie. Wees selektief as jy na mense begin luister in hierdie tyd. Baie sal in hierdie tyd ook hul eie agendas hê. Loop versigtig en luister evaluerend en onderskeidend. Onthou Spr 13:16 :”Alles wat ‘n verstandige mens doen, word met kennis gedoen…” Tree op vanuit kennis en nie uit vrees nie. Kry jou feite by mense wat betroubaar en geloofwaardig is.
  2. Nie almal het dieselfde graad van risiko in hierdie pandemie nie.
    Ouer mense wat onderliggende gesondheidsprobleme het, is veral baie kwesbaar. As jy in hierdie kategorie val, wees versigtig en kyk goed na jouself. Tree verstandig op en vra goeie raad waar dit nodig is. As daar van jou familie (bv ouers) is wat in hierdie kategorie val, doen ekstra moeite om na hulle welstand om te sien waar moontlik. Kom ons kyk mooi na mekaar en bly op ons hoede. Ons seniors is kosbaar en ons het hulle nodig in ons lewens. Kyk mooi na die broses onder ons.
  3. Dit sal verbygaan
    Die Bybel sê dat daar tye van beproewinge sal kom (1 Pet 4:12) “Geliefdes, moenie verbaas wees oor die vuurproef waaraan julle onderwerp word nie”. Hierdie is moeilike tye, maar dit sal nie vir altyd hou nie. Ons moet net doen wat die mediese praktisyns ons aanbeveel. Doen die “common sense” dinge om die verspreiding van die virus teen te werk. Hierdie noodmaatreëls sal nie vir altyd duur nie. Ons gemeente sal ook weer vorentoe bymekaar kom.
  4. Fokus op dit wat onveranderlik is, nie op dit wat veranderlik is nie.
    Daar sal nou baie dinge wees wat sal verander in jou leefwêreld en jou gemeenskap in hierdie tyd. Ons weet ook nie wat die volle impak op ons gemeenskap gaan wees nie. Ons word uitgedaag om nou christene en kerk te wees op nuwe maniere. Wees plooibaar en aanpasbaar, maar onthou dit wat onveranderlik is: jou God en sy Woord. Heb 13:8 “Jesus Christus is gister en vandag dieselfde en tot in ewigheid”. Te midde van al die veranderinge kan jy reken op hierdie waarheid. God se liefde vir jou en ons gemeenskap het ook nie verander nie. God se roeping oor jou lewe het ook nie verander nie. Moenie dat al die veranderinge jou visie wegneem van die dinge wat nog dieselfde gebly het nie.
  5. God sal saam met jou deur alles gaan
    Die virus het nie God onkant betrap nie. Hy sal saam met jou stap deur hierdie situasie. Soms sal jy baie alleen voel. Jy sal dalk voel dat niemand regtig verstaan nie, maar weet net dat jy nie alleen is nie. Onthou Jes 43:2 in hiedrie tyd: : “As jy deur water moet gaan, is Ek by jou, deur riviere, hulle sal jou nie wegspoel nie; as jy deur vuur moet gaan, sal dit jou nie skroei nie, die vlamme sal jou nie brand nie.” Fokus op hierdie waarheid en nie op al die geraas van die sosiale media nie. Jou kommer sal verander in aanbidding.
  6. Hierdie is nie die einde van die storie nie
    2 Kor 4:8, 14 “In alles word ons verdruk, maar ons is nie terneergedruk nie. Ons weet immers dat God, wat die Here Jesus uit die dood opgewek het, ons ook saam met Jesus sal opwek en ons saam met julle voor sy troon sal stel.” Paasfees herinner ons dat ons wenners is, maak nie saak wat gebeur nie. Al neem hierdie virus my lewe, ek vertrek hiervandaan na die teenwoordigheid van God. Op daardie dag sal al my pyn, siektes en hartseer verby wees. Daar is geen virus in die hemel nie. Ons weet nie wat die toekoms inhou nie, maar ons weet Wie die toekoms vashou, en daarom ook vir ons vashou!
  7. God wil ons gemeente gebruik om vir ander te help
    Soos ander gemeentes gaan ons eie gemeente ook nou deur ‘n uitdagende tyd. Maar God wil nie net hê dat ons gemeente net die krisis sal oorleef nie, Hy wil hê ons moet te midde van die krisis groei en floreer. Ons as gelowiges hanteer pyn anders as die wêreld. Ons sien elke behoefte as ‘n oop deur vir bediening. Dis ‘n geleentheid om ons oë oop te maak, die nood om ons raak te sien en God se lig te laat skyn. Daarom sal dit goed wees as jy kan bydra tot ons Hulpfonds sodat ons mense wat in nood is kan ondersteun. Sien om na jou bure, sien om na die bejaardes, kyk waar daar nood is, wees besig met praktiese hulp, al kan jy net vir iemand iets saambring van die winkel of apteek, al kan jy net bel – doen iets vir iemand anders. Die virus gaan beslis nie die kerk stop nie. (Matt 16:18 “die magte van die doderyk sal nie die kerk oorweldig nie.” En onthou! – ontdek ‘n nuwe verhouding met jou God en jou huismense! Hierdie is ‘n tyd om weer jou regte plek voor God in te neem. Hierdie is ‘n tyd om God te vra om sy regte plek in jou lewe in te neem – die sentrale plek!

Rus in hierdie waarhede! Gee jouself oor aan God en “let go! Moenie teen die prikkels skop nie! Jy sal beproef word op baie terreine, maar hierdie is ‘n groei-geleentheid sodat die beste in ons na vore kan kom, nie die slegste nie. Groei na jou beste self – die nuwe mens in Christus. Hou jouself vas, hou mekaar vas, hou vir God vas, want Hy hou jou vas en jou huismense!
Groete
Dr Gavin Meistre


Geestelike hand-higiëne!

COVID-19 – Uitdaging of geleentheid?

Liewe Garsfontein gemeentefamilie

Op 15 Maart 2020, het president Cyril Ramaphosa,  ‘n dringende oproep tot alle Suid Afrikaners gerig om saam te werk in die stryd teen die Corona-Virus (COVID-19). Een van die maatreëls wat ingestel is, is ‘n algehele verbod op samekomste wat meer as 100 mense behels, aangesien sosiale distansiëring een van die doeltreffendste voorsorgmaatreëls vir die verspreiding van die COVID-19 virus is. As geloofsfamilie, is ons gemeente by hierdie oproep ingesluit en is die welstand van alle mense vir ons belangrik. Hierdie maatreëls hou besliste uitdagings vir ons gemeente, veral ten opsigte van ons samekomste as geloofsfamilie in.

Ons erken die behoefte van gelowiges om in hierdie tyd juis die gemeenskap van gelowiges te beleef. Alhoewel die nuutste navorsing daarop dui dat infeksie in meeste gevalle nie tot ernstige simptome lei nie, dit nogtans gevaar vir ‘n spesifieke deel van ons samelewing inhou. Ons wil elke moontlike voorsorg tref om verspreiding te probeer bekamp, sodat die mees weerlose onder ons na die beste van ons vermoë beskerm kan word. Ons bely ons vertroue in die HERE se sorg en beskerming in hierdie uitdagende tye, asook ons oortuiging dat die HERE ons deur Sy Gees aanspoor om ons naaste lief te hê, soos onsself soos dit in Filippense 2:1-5 geskrywe staan:

Aangesien julle die troos in Christus ondervind het, die aansporing deur die liefde, die gemeenskap deur die Gees, die innige meegevoel en meelewing – maak dan nou my blydskap volkome deur eensgesind te wees: een in liefde, een van hart, een in strewe. Moet niks uit selfsug of eersug doen nie, maar in nederigheid moet die een die ander hoër ag as homself. Julle moenie net elkeen aan sy eie belange dink nie, maar ook aan dié van ander. Dieselfde gesindheid moet in julle wees wat daar ook in Christus Jesus was…

Om hierdie rede is besluit op die volgende reëlings en doen ons ‘n oproep aan die hele gemeente, om ons hierin te ondersteun, dat u uself sal beskerm, ander se vrese sal respekteer en dat ons steeds as kerk diensbaar sal wees tot mekaar en ons gemeenskap.

Eredienste en ander samekomste

Om hierdie rede is daar besluit dat, tot en met verdere kennisgewing, daar geen eredienste by die kerkterrein sal plaasvind nie. Eredienste sal voorts op video, asook klank formaat beskikbaar gestel word. Gesinne, groeigroepe of individue kan by die huis aan hierdie eredienste deelneem. Digitale uitsendings sal op ons webblad (nggars.org.za), NG Garsfontein Facebook blad, Youtube kanaal, asook nuwe Whatsapp groep beskikbaar gestel word teen 09:00 op elke Sondag. Volledige skakels vir hierdie uitsendings sal later in die week gekommunikeer word.

Alhoewel die Corona-Virus ‘n uitdaging vir ons gemeente, in terme van enkele aspekte van ons gemeentebediening inhou, is ons daarvan oortuig dat hierdie uitdagende tye juis ‘n ideale geleentheid bied om ons roeping as liggaam van JESUS CHRISTUS uit te leef, en ook in ons omgang met hierdie pandemie die voorbeeld van JESUS te volg. Alhoewel ons vir ‘n kort tydjie verhinder mag word om soos ons daaraan gewoond is kerk toe te “gaan”, bied die Corona-Virus aan ons ‘n besondere geleentheid om kerk te “wees”.

Binne ‘n tyd wat die fokus op ons hand-higiëne geplaas word, wil ons gesonde, Bybelse hand-higiëne toepas – anders gestel: ons wil JESUS se hande wees. Hier is praktiese wyses waarop ons dit kan doen:

Hande wat bid

In Jakobus 5 word ons herinner aan die belangrikheid van gebed in uitdagende tye, en dat die gebed van gelowiges ‘n kragtige uitwerking het. As gemeente wil ons intree in gebed vir ons land en sy mense, en baie spesifiek vir elkeen wat reeds direk deur die Corona-Virus geraak word, asook vir ons dokters en mediese personeel. Ons gaan vir die komende tydperk weekliks gebedspunte kommunikeer, waarvoor ons as gemeente (hetsy individue, gesinne of groepe) kan bid.

Hande wat dien

Die kerk was nog altyd geroep om in krisistye, nie uit vrees in hulself te onttrek nie, maar juis uit liefde uit te reik na ander in nood – hierdie moet ook waar wees vir ons gemeente. As gemeente wil ons ons gemeenskap dien op die volgende wyses:

  • Deur te hou by die riglyne vir persoonlike higiëne, sodat ons nie ons eie, of ander se welstand in gedrang bring nie. Indien jy simptome toon, is dit beter om enige sosiale samekomste te vermy en dadelik die COVID-19 hulplyn-nommer te skakel: 0800 029 999.
  • Deur die skenking van hand-skoonmaak-middels, immuun-medikasie, handskoene en ander mediese hulpmiddels aan persone wat nie hiertoe toegang het nie, byvoorbeeld: hawelose persone, motorwagte, huishulpe, ensomeer.
  • Vanweë die skielike sluiting van die skole in ons omgewing, kan ons werkende lidmate help deur hul kinders op te pas.
  • Indien jou firma se werksaamhede ongedeerd kan voortgaan, kan jy persone wie se werk weens COVID-19 maatreëls gestaak is, in diens neem – eerder as om te “out-source”.
  • Bejaardesorg, veral in terme van hulp met inkopies en basiese benodighede, aangesien bejaardes deel van die hoë-risiko groep uitmaak.
  • Kontak asb. die kerkkantoor indien u op enige van hierdie of ander wyses kan help, of indien u hulp benodig.

Hande wat gee

Die tydelike afskaffing van eredienste hou finansiële uitdagings vir gemeentes en hul dienswerk in. Ons is ook daarvan bewus dat baie mense tans sonder inkomste is, vanweë die COVID-19 maatreëls, en dus finansiële ondersteuning benodig. Daarom versoek ons u om steeds voort te gaan om op een van die volgende wyses u weeklikse erediens-dankoffers, en enige finansiële bydraes te gee, sodat ons gemeente op volhoubare wyse met ons werksaamhede kan voortgaan en ander se nood kan help verlig.

Indien enige iemand hulp of ondersteuning benodig, kan julle gerus die kerkkantoor of enige van ons leraars kontak. As gemeente sal ons mekaar in hierdie tyd omarm, ondersteun en dien – saam met Christus en saam met mekaar sal ook hierdie stormagtige tye weer tot bedaring kom,

Tot dan – kom ons pas gesonde, geestelike hand-higiëne toe.

Baie liefde en groete

Dr. Gavin Meistre en Dr. Jaco Barnard

Spesiale reëlings rondom dienste tydens Paasnaweek word nog gefinaliseer en sal binnekort aan die gemeente gekommunikeer word.


Garsfontein Gemeente se Plan van aksie!

Ons groet al ons gemeentelede,

In die lig van President Ramaphosa se aankondiging gisteraand aan Suid-Afrika rakende die Covid-19 virus, het die Leraarbediening vanmôre besluit om die volgende interimreëlings bekend te maak rakende ons gemeentelike byeenkomste vir die volgende maand.

  • Dis vir ons as gemeente belangrik om in te val by die noodmaatreëls soos aangekondig deur die President, ter wille van ons almal se algehele welsyn.
  • Ons het geoordeel dat dit ook belangrik is om gedurende hierdie tyd as gemeente bymekaar te kom by eredienste, sodat ons mekaar kan bemoedig en vir mekaar, ons land en die wêreld kan bid rondom hierdie pandemie. Ons stap saam met Jesus op sy lydensweg in ‘n baie moeilike tyd in die wêreld se bestaan. Ons wil onsself nie onnodiglik isoleer van mekaar nie, behalwe as ons simptome manifesteer. Ons wil egter ons getalle tydens die oggenddienste beperk soos voorgeskryf deur die President.
  • Daarom sal ons vir die sondae wat kom twee kort agtereenvolgende oggenddienste hou, te wete om 08:00 – 08:30 en dan ook vanaf 09:00-09:30. Dieselfde geld vir Paasnaweek se eredienste. Die nagmaal op Goeie Vrydag sal dalk bietjie langer duur maar daar sal twee dienste wees die oggend waarby by albei dienste nagmaal bedien sal word. Dieselfde predikers sal dieselfde dienste met dieselfde temas herhaal.
  • Van ons kant sal ons ons beste doen om oppervlaktes by die kerk te saniteer. Ons sal ook by die ingangsportaal saniteer-geriewe aanbring.
  • Verder wil ons mekaar sterk ontmoedig om met die hand te groet – groet liewers met die elmboog, indien enigsins nodig.
  • Sit ook sover moontlik verpreid in die kerk en handhaaf ‘n gesonde afstand van mekaar.
  • Bly waaksaam, bly veilig en gesond. Probeer streng te hou by die voorskrifte rondom persoonlike higiëne.
  • Omdat hierdie kritiese tye is, is dit belangrik dat ons die erns van die situasie in gedagte sal hou.
  • Laat weet die kerkkantoor indien jy ondersteuning benodig.
  • Ons sal voortgaan met die twee oggenddienste tot verdere kennisgewing en riglyne van die owerhede.

 – Die inligtingsessie van Dr Maniraj Sukdaven wat op 17 Maart sou plaasvind word uitgestel na 28 April.  Dit sal dan ook die eerste Woordsterk sessie wees van die nuwe kwartaal.

– Die Diamante se Tradisionele ete wat op 19 April sou plaasvind is ook gekanselleer! Hulle sal dit herskeduleer na ‘n nuwe datum.

 – Die familiefees van 5 April word gekanselleer.


Vertrou God se doel!

In die lydenstyd word ons opnuut bewus van Jesus se weg van lyding. Sy lyding herinner ons ook aan ons eie lyding. Ons eie lyding wissel van mens tot mens. Dis belangrik om altyd te onthou: vertrou God se doel met jou lewe in die moeilikste tye. God se doel met jou lewe is altyd groter as jou probleme.

“Om hierdie rede word ons nie moedeloos nie. Al is ons uiterlik besig om te vergaan, innerlik word ons van dag tot dag vernuwe. Ons swaarkry in hierdie lewe is maar gering en gaan verby, maar dit loop vir ons uit op ‘n heerlikheid wat alles verreweg oortref en wat ewig bly.” (2 Kor 4:16-17)

“This is the reason why we never collapse . . . These little troubles (which are really so transitory) are winning for us a permanent, glorious and solid reward out of all proportion to our pain.” (Phillips)

Hoekom ek? Wanneer die lewe in sy harde werklikheid gebeur sal die meeste mense uiteindelik hierdie vraag vra. Maar dis die verkeerde vraag om te vra tydens donker dae. Vra liewer: “Here, wat is U doel met dit alles?”

In 1 Pet 1:6-7 lees ons: “Verheug julle hieroor, selfs al is dit nodig dat julle ‘n kort tydjie bedroef gemaak word deur allerhande beproewings sodat die egtheid van julle geloof getoets kan word. Julle geloof is baie kosbaarder as goud, goud wat vergaan.”

Niks gebeur in jou lewe per toeval nie. God is nie die oorsprong van kwaad nie, maar Hy kan die goeie uit elke situasie na vore bring, selfs uit kwaad. Beproewinge en toetsinge openbaar jou karakter, jou geestelike volwassenheid, jou sekuriteit, jou waardes en geloof.

Paulus het sy hele lewe daaraan toegewy om God te dien. Sy lewe het soms maar erg uitgedraai; hy is gestenig, hy was ‘n skipbreukeling, hy is geslaan – vir dood agtergelaat, in die gevangenis gegooi, beroof. Ons kan nie agterkom dat hy ooit bitter was nie. In plaas daarvan dat hy gevra het: Hoekom ek Here?”, het hy Hy geglo dat God met dit alles ‘n doel gehad het. Hy het geleer om God te vertrou te midde van sy probleme, al het hy nie verstaan nie.

Wat is die geheim van sy volharding? Hy het aan die hoop vasgehou omdat God ‘n doel gehad het met sy probleme. God het ook ‘n beloning gereed gemaak wat die pyn by verre oortref het. Toe Jesus aan die kruis gesterf het, het sy volgelinge gedink dis ‘n sinnelose tragedie, ‘n groot fout. Hulle kon nie sien dat God nogsteeds op sy troon sit nie, besig om sy groter doel uit te voer. Na sy opstanding het Jesus aan sy dissipels verskyn en vir hulle sy vrede gegee: “Soos die Vader My gestuur het, stuur Ek julle ook.”

Net oomblikke tevore kon hulle geen rede sien vir hul pyn en verlies nie. En hier kom Jesus en vertel hulle van hul nuwe opdrag wat deel sou vorm van God se groot doel. God se doel met jou lewe is altyd groter as jou probleme. Vertrou Hom! Hy verander kruisigings na opstandings. Hy spesialiseer in hopelose situasies.


DIE MISTERIE VAN MY BESTAAN

“Die Here het aan my verskyn uit die verte: Ja, Ek het jou liefgehad met ’n ewige liefde; daarom het Ek jou getrek met goedertierenheid.”  (Jer 31:3)

In die Lydenstyd word ek bewus van my eie verganklikheid, dat my fisiese bestaan op aarde, my tydelik en sterflik is. Maar ek word ook aan die ander kant bewus van my onverganklikheid. Ek omarm albei hierdie werklikhede – hierdie twee saam is deel van die misterie van my lewe en bestaan hier op aarde. Hoe meer ek daaroor nadink, hoe meer word ek bewus van skuiwe in my binnewêreld as beelddraer van God.

Ek is ewig – en dit is wonderlik om dit te weet. My lewe het nie ‘n einde nie! Wanneer ek sterf is dit nie nie einde van my nie. As gelowig gaan ek vir altyd lewe in die nuwe hemel wat kom. Nie noodwendig op dieselfde manier as nou nie, maar saam met al my ander Christenpelgrimsreisigers glo ek dat ek in hierdie ewigheid, deur God se genade, altyd saam met Hom gaan wees.

My lewe het ook nie ’n begin nie!

Die grootsheid van my ewig-wees is meer as net my lewe na die dood. Volgens die

Joodse tradisie bestaan ek al lankal, nog vóór my konsepsie. My konsepsie was

maar net die begin van my aardse lewe wat deur die dood tot ’n einde kom. Dié

gedagte val effens vreemd op my oor, en soos baie ander Christene is ek geneig

om nie baie van my vooraardse bestaan te maak nie.

Dít is die misterie van my bestaan – ek is uit God, ek kom van Hom af, ek leef as gelowige deur God en vanuit God se lewe en krag en ek sal weer tot God

terugkeer. Wat ‘n grootse gedagte – dit gaan my verstand te bowe – God se liefde strek verby my aardse lewensduur en denke.

In die Lydenstyd wil ek van hierdie misterie ervaar hier in my binneste. Die Here het vir jou en my lief met ‘n ewige liefde, daarom het Hy my in die lewe ingestuur met die doel om Hom te eer en verheerlik vir solank ek op die aarde is.