Tag: NG Garsfontein


God ken die einde van die storie!

“Ons noem hulle geseënd omdat hulle volhard het. Julle het gehoor van die volharding van Job en julle het gesien waarop die Here dit laat uitloop het. Die Here is immers ryk aan barmhartigheid en ontferming.” (Jak 5:11)

Die groot vraag wat almal nou vra is: wanneer sal alles weer terugkeer na normaal? Gisteraand het ons gehoor dat ons Sondagnag na Vlak 1 beweeg van die inperking, maar dis nog nie die “normale” wat ons altyd geken het nie. Dit is nogsteeds die “nuwe normaal”. Ons kan nog nie afweeg na die “ou normaal” nie, omdat dit vir ons te veel gesondheidsrisikos inhou. Dit sal seker waarskynlik gebeur wanneer daar ‘n doeltreffende entstof onwikkel word – en dit sal nie gou gebeur nie. So ons wonder maar oor die toekoms, hoe alles sal uitspeel vorentoe.

Maar wat gaan ek en jy doen as die lewe glad nie terugkeer na “normaal” nie?

Die antwoord is baie eenvoudig. Jy plaas nie jou hoop in die regering nie, ook nie in die media of “celebrities” nie. Jy plaas jou hoop in God.

Hoekom hoop ek op God?

Want Hy ken die einde van die storie. Ons hoef nie dit te weet nie, want Hy weet dit. Hy hou die toekoms stewig vas.

Die verhaal van Job demonstreer dit alles baie goed. Alles is van hom weggeneem. Kan jy jou indink hoe dit moes gewees het? Hy het nie die toekoms geken nie. Hy het glad nie ‘n idee gehad dat God alles weer aan die einde gaan herstel nie. Maar Hy het op die Here vertrou. The Message stel dit so:

“What a gift life is to those who stay the course! You’ve heard, of course, of Job’s staying power, and you know how God brought it all together for him at the end. That’s because God cares, cares right down to the last detail(Jak 5:11, The Message).

God het deur die detail van Job se lewe gewerk omdat Hy vir Hom omgegee het. God sal dieselfde vir jou en my doen. Dit maak nie saak hoeveel jy opgemors het in die eerste helfte van jou lewe nie, vertrou God om die detail van jou lewe te hanteer en kyk hoe Hy alles mooi saambring in die tweede hefte van jou lewe. Trouens, God weet al klaar hoe jou storie gaan eindig.

In werklikheid is dit eintlik sy storie, want Hy het jou gemaak om ‘n unieke en betekenisvolle deel van sy storie te wees. Daarom kan jy vertrou dat Hy daaraan werk om vir jou te sorg en jou ‘n goeie toekoms te gee.

Hy sal ons ook eendag beloon vir ons geloof. “Gelukkig is die mens wat in versoeking standvastig bly. As hy die toets deurstaan het, sal hy as oorwinningsprys die lewe ontvang wat die Here belowe het aan dié wat Hom liefhet” (Jak 1:12).

Dit maak nie saak waardeur jy nou gaan nie, God belowe om alles vir jou uit te werk ten goede. Dit is ‘n belangrike rede om te bly hoop en op Hom te vertrou.


God voorsien in my behoeftes!

God voorsien in my behoeftes, maar ek moet die geheim snap van hoe Hy in my behoeftes voorsien. Hierdie geheim gaan oor die “beginsel van die oes”.

Wat is die “beginsel van die oes”?   Dit is: wat jy saai, sal jy oes.

Hoe meer ek weggee, hoe meer sal ek ontvang. Baie verse in die Bybel gaan oor hierdie beginsel. Dink maar aan Matt 17:20:”Omdat julle geloof te klein is,” sê Hy vir hulle. “Dit verseker ek julle: As julle maar geloof het so groot soos ‘n mosterdsaadjie, sal julle vir hierdie berg sê: Gaan staan daar anderkant! En hy sal gaan. Niks sal vir julle onmoontlik wees nie.”

Dis nie die grootte van ons geloof wat saakmaak nie. Dis die grootte van ons God in wie ons ons vertroue plaas. ‘n Klein bietjie geloof in ‘n groot God lewer groot resultate. Maar Jesus sê iets nog meer belangrik: Hy vergelyk nie net geloof met die grootte van ‘n saadjie nie, Hy vergelyk dit ook met die aard van die saadjie. As jy verstaan hoe ‘n saadjie werk, sal jy verstaan hoe geloof in jou lewe ook werk.

Hoe werk ‘n saadjie? Jy moet dit plant sodat dit vrugte kan dra. ‘n Saadjie beteken niks tensy dit geplant word. So werk die geloof. Hoe werk hierdie beginsel van die oes  nou prakties in my lewe?

  1. Kyk na God as die enigste Bron van ons voorsiening

Dit leer Paulus vir ons in Fil 4:19: ”En my God sal in elke behoefte van julle ryklik voorsien volgens sy wonderbaarlike rykdom in Christus Jesus.”

“Elke behoefte”  –  beteken letterlik elke behoefte. Waar die Here ons lei, sal Hy voorsien.

Ons sukkel hiermee want ons is geneig om die kanaal te verwar met die bron. Ons dink dikwels dat ons harde werk, ons talente en ons hulpbronne is ons voorsiening. Nee, dit is eenvoudig die kanale waardeur God sy voorsiening vir ons bring. Hy moet die kreditet kry vir alle voorsiening aan ons. Hy is die Bron van alle voorsiening.

Jakobus herinner ons in Jak 1:16-17: “Moenie julleself mislei nie, my liewe broers. Elke goeie gawe en elke volmaakte geskenk kom van Bo. Dit kom van die Vader wat die hemelligte geskep het, maar wat self nie soos hulle verander of verduister nie.”

  • Wanneer jy ‘n sekere behoefte het, plant ‘n saadjie.

Wanneer jy ‘n behoefte het, soek vir iets wat jy kan weggee. Deur dit te doen demonstreer jy geloof. Natuurlik moet ek bid en vra, maar God vra ook geloofsaksie van my kant af. 2 Kor 9:6: “Dink daaraan: wie karig saai, sal karig oes; en wie volop saai, sal volop oes.”  Wanneer jy iets weggee, gee God dit terug vir jou – Hy gee vir jou meer as wat jy nodig het sodat jy dit met ander kan deel.

  • Verwag ‘n oes

Die oes is onafwendbaar, ongeag hoe jy daaroor voel. As jy op God vertrou as die Bron van jou voorsiening en jy plant saadjies, kan jy ‘n oes verwag.

Jesus sê in Luk 6:38: “Gee en vir julle sal gegee word: ‘n goeie maat, ingestamp, geskud en propvol, sal hulle in julle hande gee.”

God doen in jou lewe wat jy van Hom verwag Hy moet doen. Wanneer Hy groot dinge vir jou doen, is dit omdat jy ‘n verwagting van Hom gehad het, nie omdat jy dit verdien het nie. Dis omdat jy ‘n saadjie geplant het. Hoe meer jy plant, hoe meer resultate sien jy. Maar onthou, God is nie ‘n kits koopmasjien nie. ‘n Koopmasjien sal vir jou gee wat jy ookal wil hê, selfs dinge wat jou kan seermaak. Nee, Hy is ‘n liefdevolle Vader vir elkeen wat in Hom glo. God het sy liefde aan ons oor en oor bewys deur vir ons beginsels te gee waarvolgens ons kan leef. Wanneer ons dit in die praktyk beoefen, sal dit vir ons wonderlike vrug en seën bring.


'n Hart vol lente!

‘n Hart vol lente behels die gee van myself vir ander. Dit maak my lewe sinvol. Ek word bruikbaar en stel myself beskikbaar om dáár te wees vir ander. Dit begin by my naby familiekring – en van daar kring dit wyer uit na die mense wat my lewenspad elke dag kruis. Om so deur die Here gebruik te word, hoef ek nie perfek te wees nie, dis net belangrik om skoon en rein te wees.
Paulus sê in 2 Tim 2:21: “As iemand hom van die kwaad gereinig het, sal hy ‘n voorwerp vir besondere gebruik wees. Dan sal hy vir die eienaar afgesonder en bruikbaar wees, voorberei vir enige goeie diens.”
As jy deur God gebruik wil word, is dit nodig dat jou hart gereinig word. Ek hoef gelukkig nie perfek te wees nie. God gebruik allerlei soorte mense: skaam mense, uitgaande mense, mense van alle rasse en kulturele agtergronde, mense van alle ouderdomme, lewensfases en beroepe. Hy gebruik manne en vroue, Hy gebruik gewone instrumente en voorwerpe, maar Hy gebruik ook voorwerpe vir gespesialiseerde gebruik. Hy gebruik groot en klein voorwerpe, allerhande voorwerpe. Daar is egter voorwerpe wat God nie sal gebruik nie, en dis ‘n vuil voorwerp of houer. Jy moet skoon wees aan die binnekant.
Hoe word ek ‘n rein voorwerp vir besondere gebruik deur God? Hoe reining ek myself? Jy doen dit deur ‘n baie eenvoudige aksie uit te voer: bely! Die kerkvader Augustinus het eenkeer geskryf: “Die belydenis van slegte werke is die begin van goeie werke”. Johannes nooi ons juis uit in 1 Joh 1:9 om ons sonde voor God te bely – Hy sal sy belofte gestand doen deur ons dan te vergewe en ons te reinig van alle verkeerde dade.
Die woordjie “bely” in Grieks is homologeo. Homo beteken “dieselfde” en logeo beteken “om te sê”. Homologeo beteken dus letterlik om dieselfde te sê as God omtrent my sonde. Dit beteken om met Hom saam te stem oor my sonde. “Here, U is heeltemal reg. Dit was nie net ‘n faux pas nie, ‘n foutjie of ‘n glipsie nie. Dit was sonde. Dit was verkeerd. Ek hoef nie met God daaroor te onderhandel (bargain) nie – (ek sal dit nooit weer doen nie); Ek hoef nie vir God daaroor om te koop nie – (ek belowe om my Bybel elke dag te lees as U my vergewe). Aanvaar en erken dit net. Dis al! En dit noem ons genade!
Neem tyd hierdie week en skryf vir ‘n slag alles neer wat verkeerd is in jou lewe. As jy klaar is, skryf 1 Joh 1:9 daaroor. Bely en erken dit voor God. Vra God om jou hart en jou lewe skoon te maak. Dis die beginpunt om weer deur God gebruik te word. Geniet die lente-lewe by saam met die God van die lente..


Lockdown-Woede!

Dit kan dalk wees dat ‘n paar van ons in hierdie tyd ‘n bietjie kort van draad is? Die situasie waarin ons onsself bevind maak dit net erger. Ons geduld met ons omstandighede en met mense is maar min. Dit moet nie as ‘n verrassing kom nie. Daar is baie redes waarom ons kwaad kan wees – self-isolasie vir lang periodes, werksverliese, verminderde salarisse, irrasionele, inkonsekwente en onregverdige optredes van die owerhede, woelinge in ons eie harte.

Woede hoef egter nie die oorhand oor ons te kry nie. Meer as ooit is dit tyd om goed te dink oor hoe ons geloof daartoe kan bydra om ons kalm te hou, selfs in tye van krisis. Woede is nie altyd verkeerd nie. Die Bybel vertel dat God ook op toepaslike geleenthede woede beleef. Die rede hoekom ons woede beleef is omdat ons na sy beeld geskep is.

Woede wat egter nie goed bestuur word nie, is ‘n probleem – en dis ‘n sonde! Genadiglik kan God ons help om ons woede beter te bestuur te midde van chaos. Kyk gerus na hierdie volgende Bybelse patroon:

Besef die koste van onbeheersde woede

Daar is ‘n prys op jou woede. Spr 29:22 sê:” ‘n Persoon wat gou kwaad word, laat mense twis, hy laat mense baie sonde doen.” Jy het dit al sien uitspeel in jou lewe en ook in dié van ander. Spreuke lys verskeie moeilikhede wat veroorsaak word deur woede. Woede lei tot foute wat begaan word, dwase optredes, verbreekte verhoudinge (Spr 14:29,17; 11:29). Woede is nie die prys werd wat jy daarvoor betaal nie.

Besluit om jou woede te bestuur

Jy sal moet besluit: sal jy toelaat dat jou woede jouself en ander seermaak? Jy kan jou woede beheer – wees eerlik met jouself. Met God se hulp is jou woede beheerbaar. Spr 29:11:”Wanneer ‘n dwaas kwaad is, dan sê hy alles wat hy dink, ‘n wyse mens bly kalm.” Jy sal vooraf moet voorberei oor hoe jy korrek sal reageer in situasies wat jou kwaad maak. Moenie hieroor uitstel nie.

Dink voor jy reageer

Dink voor jy praat, dink voor jy doen. Moenie impulsief reageer nie. Jakobus skryf sy brief aan christene wat deur moeilike tye gegaan het. Hy sê in Jak 1:19-20:”moenie haastig wees om te praat nie, hy moet eers dink voordat hy praat. Hy moet ook nie haastig wees om kwaad te word nie.” Wanneer mense voel dat daar na hulle geluister word, verminder dit die frustrasies en verlig hulle seer. Woede-beheer is eintlik mond-beheer. Jy tem jou humeur deur jou tong te tem.

Raak ontslae van woede op paslike wyses

Woede is nie noodwendig die probleem nie. Dit word net ‘n probleem wanneer dit op onvanpaste wyses tot uiting kom. Efes 4:26 maak dit duidelik:”Wanneer julle kwaad word, dan moet julle nie sonde doen nie.” Baie van ons openbaar woede op wyses wat ons verder wegneem van ons doelstellings in die lewe. As ek innerlike genesing wil ontvang, my frustrasies wil oplos, my vrese wil verlig, dan sal ‘n woede-uitbarsting beslis in die pad staan. Wat is die beste wyse om met woede te werk? Moenie dit laat ontplof nie. Moet dit ook nie onderdruk nie, want dit lei tot depressie. Moenie dit op onvanpaste wyse tot uitdrukking laat kom soos byvoorbeeld deur sarkasme, woede-uitbarstings, ensomeer nie. Bely en erken dit! Laat mense weet dat jy seergekry het.

‘n Nuwe patroon in jou gemoed

Jou gedagtes bepaal jou emosies. Jou emosies bepaal jou optredes. As jy die gewoonte van woede wil verbreek, sal jy jou manier van dink moet verander. Sedert jy jongdae het jy waarskynlik geleer hoe om kwaad te word deur jou interaksie met ander om jou. Dit is dalk ook deur ander aan jou gemodelleer. Die goeie nuus is: jy kan ‘n ander en nuwe patroon aanleer. Rom 12:2:”Julle moenie aan hierdie sondige wêreld gelyk word nie, maar laat God julle verander deur julle denke te vernuwe. Dan sal julle ook kan onderskei wat die wil van God is, en wat vir Hom goed en aanneemlik en volmaak is.”

Vra God om jou met sy liefde te vul God se liefde is ‘n transformerende krag wat ons verander van kwaai mense na vredevolle mense. Paulus sê vir ons in 1 Kor 13:5 dat die liefde nie vinnig kwaad word nie en geduldig bly. Wanneer ons met God se liefde gevul is, heers woede nie meer oor ons nie. Ons verhouding met Christus het ‘n groot invloed op ons vermoë om woede in ons lewens te bemeester. God se liefde kan ons verander selfs in tye soos hierdie. Laat God jou help om jou woede te bestuur. Dit was tot dusver ‘n uitdagende jaar. God gebruik tye soos hierdie om jou karakter te  vorm. Soos wat woede om jou ontplof, laat God se besondere vrede deur jou skyn.


Blaf jy by die regte boom?

“Laat die Gees ook nou ons gedrag bepaal”  (Gal 5:25)

Die wêreld is begryplik in rep en roer met die pandemie wat oral kop uitsteek. Wat dit nog erger maak is die ander onaangename dinge wat die nuus haal: die oormatige vergrype van wetstoepassers, soveel so dat lewensverlies plaasvind aan die hand van sommige geweldadige lede van die “beskermingsdienste”. Hierdie vergrype kan natuurlik nie geduld word nie. Ook die uiterste geweld teen vroue in Suid-Afrika, dit is alles skokkende tendense! Hierdie misbruike was nog altyd by ons, maar die situasie rondom Covid-19 maak dit nog erger. Die situasie werk op mense se spiere. Dit bring angs, vrees en onsekerheid wat altyd die slegste uit ons na vore bring. Ons raak gefrustreerd en geïrriteerd, ons raak ongeduldig, ons oorreageer, ons word ongeskik, onsensitief, oorsensitief en die mees sagmoedigste Neelsies verander in die mees aggressiewe bullebakke. Kyk maar hoe mense hulle agter die stuurwiel gedra. Daar is dieperliggende dinge wat ons pla en dan borrel dit uit na die oppervlakte op onaangename wyses. So ontstaan ‘n gees van onbeheersdheid wat sleg is vir onsself en die mense op ons. Ons almal ly hier onder een of ander tyd.

In so ‘n tyd is dit nodig om net te gaan stilsit en te dink. Wie is ek en Wie s’n is ek? Wat is my waardes? Is ek op die oorlogspad? Is ek dalk met ‘n verkeerde oorlog besig? Ek baklei met die mense om my, maar eintlik is ek ongelukkig en gefrustreerd met myself en my lewensituasie? Ek blaf dalk by die verkeerde boom. Eintlik moet ek by my eie boom blaf. Dis dan wanneer ek moet onthou dat ek ‘n Gees-mens is. Ek het die Gees in my. Hy wil my rustig maak. Hy wil my leer hoe ek my frustrasies kan hanteer. Ek moet my oorgee aan die Gees, sodat Hy van my besit kan neem en ek sy vrug van selfbeheersing kan dra. Hy is nog altyd by my. Ek moet net bewus wees van Hom. So maak ons dit nie vir mekaar meer kompleks nie, maar eerder makliker.

Daar is ‘n wonderlike saamwerk tussen dit wat God doen en dit wat ek doen – ‘n heilige samewerking! God doen altyd eerste: Hy skep, onderhou, sorg en koester, Hy neem inisiatief! As Hy gedoen het, roep Hy vir my om ook te doen. Ek kan dan reageer in gehoorsaamheid, diens en liefde. God reik elke dag na my uit in sy liefde. Wanneer ek ‘n tree in die geloof begin neem na Hom, gebeur daar groot dinge.  Die Bybel is vol sulke verhale. Met een tree in die geloof word die krag van die Heilige Gees in my lewe geopenbaar.  Toe Josua gekonfronteer is met die vloedwaters van die Jordaanrivier  (Jos 3), neem die leiers net een tree in die water  –  in gehoorsaamheid en geloof – en die waters droog op om ‘n pad vir hulle oop te maak deur die Jordaanrivier.

God het gedoen – Hy wag nou vir jou om te doen!  Moenie wag totdat jy sterk of moedig voel nie. Beur voort in jou swakheid terwyl jy die regte dinge begin doen,  ten spyte van jou vrees, onsekerheid en frustrasies. So werk jy saam met die Heilige Gees – so word jou karakter gevorm.

Die Bybel vergelyk geestelike groei met ‘n saadjie, ‘n gebou en ‘n kind wat groot word. Elke metafoor weerspieël aktiewe deelname van my kant af: die saad moet geplant en versorg word, die gebou moet gebou word – dit verskyn nie eendag uit niks uit nie. Kinders moet eet en oefening kry om te kan groei. Ons eie inspanning het niks te doen met ons verlossing nie – dit het God alleen gedoen aan die kruis. Ons het geen rol gespeel by ons verlossing nie. Ons inspanning kom wanneer ons die groeipad begin stap saam met die Gees. Ons word sommer baie kere in die Nuwe Testament aangemoedig om moeite te doen om te groei om soos Jesus te word. Kyk maar na verse soos Luk 13:24; Rom 14:19; Efes 4:3; 2 Tim 2:15; Heb 4:11; Heb 12:14; 2 Pet 3:14; Fil 3:12-14. Jy kan nie rond sit en wag dat alles vir jou moet gebeur nie.

Paulus verduidelik vir ons in Efes 4 :22-24 dat ons 3 verantwoordelikhede het in ons geloofsreis om soos Jesus te word:

1.   Ons kies om die ou manier van doen agter te laat (Efes 4:22 “Hou dan op om te lewe soos julle vroeer gelewe het”.)

2.   Ons verander ons manier van dink (Efes 4:23 “Julle gees en gedagtes moet nuut word”.) Paulus sê in Rom 12:2 dat ons getransformeer word deur die vernuwing van ons gedagtes. Die Griekse woord vir verander / transformeer is die woord: “metamorfose” – dit word gebruik in Rom 12:2 en 2 Kor 3:18. Vandag word hierdie woord gebruik om die wonderlike verandering te beskryf wat ‘n ruspe ondergaan na ‘n skoenlapper. Wanneer God die koers aandui in ons gedagtes, vind hierdie geestelike transformasie plaas in ons lewens. Ons word van binne af verander, ons word mooier, ons word vrygelaat om na groot hoogtes te vlieg.

3.   Ons trek die karakter van Jesus aan Hoe doen ons dit? Deur nuwe bevrydende gewoontes te ontwikkel. Jou karakter is eintlik maar die somtotaal van jou gewoontes – dit is maar hoe jy op grond van ‘n klomp gewoontes optree. Efes 4:24: “lewe as nuwe mense wat as die beeld van God geskep is: lewe volkome volgens die wil van God en wees heilig”.

Ons hoef nie met die Gees te “kompeteer” nie. Ons hoef nie sy werk vir Hom te probeer doen nie. Ons hoef nie sy werk “oor te vat” nie. Ek kan maar net doen wat ek moet doen. Ek werk saam met die Gees, sodat ek kan groei om soos Jesus te wees. Hierdie tyd is groeityd! Word bemoedig – en groei deur al jou laagtepunte. Die Here vat jou by die hand! Kom ons maak dit makliker vir mekaar en nie moeiliker nie.


ONS IS OP VLAK 3 MAAR JY VOEL OP MOEDVERLOOR SE VLAK 0

Voel jy op Vlak 0 vandag –  totaal emosioneel gedreineer en uitgeput. Covid-19 het jou nie platgetrek nie, maar jy is innerlik-emosioneel siek daarvan, platgetrek van al die gepraat van die “nuwe normaal”.  Jy voel innerlik swak van al die weerstand bied teen al die potensiële gevare dat jy nie lus voel om jou voet uit die bed te sit nie – dalk sal jy daar op jou veiligste wees. Jy voel lus om in ‘n hoekie te gaan sit van uitputting. En jy voel baie skuldig dat jy so voel, en jy probeer jou bes om sterk te wees vir jouself en jou mense, maar eintlik weet jy jy is baie swak. Jy is dalk so bewus van jou eie foute, gebreke en tekortkominge.

Moenie moed verloor nie! Wees dapper en gaan net aan! Het jy geweet God gebruik mense soos jy. God werk deur mense wat swak is, mense wat weet dat hulle swak is, mense wat voel dat hulle aan die einde van hul kragte gekom het. God werk deur mense wat vol foute en gebreke is. God kon gekies het om net deur mense te werk wat sterk en agtermekaar is, maar Hy sou nie veel gedoen gekry het op daardie manier nie. Die feit van die saak is, ons is almal gebroke.

2 Kor 4:7: “Ons wat hierdie skat in ons het, is maar kleipotte wat maklik breek; die krag wat alles oortref, kom dus van God, nie van ons nie.”

God gebruik swak mense om sy krag te wys. God het gekies om sy heerlikheid in kleipotte te plaas. As jy ‘n kleipot laat val, sal dit breek, net soos ek en jy. Ons is geestelik, fisies en emosioneel breekbaar.

Die geskiedenis van die kerk is gevul met voorbeelde van hoe God werk deur gebreekte en seergemaakte mense. Hoekom gebruik God hierdie mense? Sodat sy heerlikheid en krag na vore kan kom. Vir God om jou te gebruik vir die res van jou lewe, sal jy mank loop vir die res van jou lewe. Jy kan nie jou menslikheid wegsteek nie. Om jou menslikheid, swakheid en broosheid te ontken is nie net oneerlik nie, jy bewys ook jouself en ander ‘n groot onguns.

Trouens, jou brose menslikheid is eintlik een van jou grootste kragte wat jy het. As jy nie jou swakhede wegsteek nie, sal dit jou altyd dwing om op God te vertrou. God het sy grootste gawes in eenvoudige kleipotte geplaas, sodat Hy die krediet kan kry daarvoor. God het dit oor en oor gedoen in die Bybel, selfs voordat Hy sy kerk gevestig het.

Heb 11:32-34 “Die tyd ontbreek my om te vertel van Gideon, Barak, Simson en Jefta, van Dawid, Sameul en die profete. Deur die geloof het hulle koninkryke verower, die reg van God gehandhaaf en verkry wat God beloof het; hulle het leeus se bekke toegestop, gloeiende vuur geblus en aan die swaard ontkom; hulle het in swakheid krag ontvang, was sterk in oorlog en het leërs van vreemdes op die vlug gejaag.”

Dit is wat God met ons doen. Hy neem ons swakheid en omskep dit in krag.

Die Bybel beskryf Gideon as baie dapper man, en tog was hy ‘n lafaard wat weggekruip het in ‘n parskuip toe die engel aan hom verskyn het in Rigters 6:11-12. Hy was die jongste kind, komende uit die swakste en armste familie en die swakste stam. Maar God het hom sterk gemaak.

Petrus was alles behalwe stabiel. Hy was Mnr Impulsief dwarsdeur die evangelies, maar Jesus het aan hom verklaar : Jy is die rots waarop die kerk gebou sal word. Hy het onstabiele Petrus verander in ‘n rots van stabiliteit vir die vroeë kerk.

Dawid was ‘n egbreker en moordenaar, en tog word hy genoem die man na God se hart (Hand 13:22).

Abraham word genoem die “Vader van die geloof”, maar hy het so min geloof gehad dat hy twee maal sy vrou gevra het om te lieg om sodoende sy eie lewe te red.

Hudson Taylor, ‘n Britse sendeling na Sjina in die 19e eeu, het eenkeer gesê: “All God’s giants have been weak people.”  Jy sien die waarheid van hierdie stelling dwarsdeur die hele Bybel. Jy sien dit in die lewens van die groot reuse van die kerkgeskiedenis. God hou daarvan om swak mense te gebruik om sy wil uit te voer.

1 Kor 1:27 “wat vir die wêreld onsin is, het God uitgekies om die geleerdes te beskaam; wat vir die wêreld swak is, het God uitgekies om die sterkes te beskaam, en wat vir die wêreld sonder aansien of betekenis is, ja, wat niks is nie, het God uitgekies om wat iets is, tot niet te maak.”

Wat is die swakheid in jou lewe wat jy die meeste wil wegsteek?

Dis tyd om dit vir God te gee om te gebruik tot sy groter doel. God kan en wil enigeen gebruik wat niks terughou nie, selfs nie hul grootste swakheid nie.

So hoe lyk dit vandag met jou op Vlak 0? Skep moed! Haal diep asem! Onthou wie jy is? Onthou veral Wie s’n jy is! God se krag word in jou swakheid volbring! Laat jou liggaam weer in beweging kom. Doen die regte ding in die geloof en in God se krag – en die hart en emosies sal volg!


Stap saam met die Gees!

Hierdie sondag vier ons die koms van die Heilige Gees na die aarde. Wat ‘n besondere dag vir die kerk van Jesus  – en vir elke gelowige. Sonder die Gees kan ons nie geestelik bestaan nie. Ons het Hom nodig met elke tree wat ons neem agter Jesus aan. Dis Hy wat ons bekragtig vir elke taak en uitdaging. Hy help ons om deur donker tye te beweeg, soos nou.  Hy help ons ook om ontslae te raak van negatiewe dinge en gewoontes in ons. Dit laat my dink aan die woorde van Paulus in Efes 4:23 “julle gees en gedagtes moet nuut word”. Hierin speel die Heilige Gees ‘n onmisbare rol  – Hy is ons Heiligmaker wat Jesus se nuwe lewe in ons harte indra. Hy blaas die basuin sodat ek en jy kan opstaan uit ons sondeslaap –en die nuwe dag van God tegemoet kan gaan.

Die oomblik wanneer ek in die geloof agter Jesus begin aanstap, ontsluit die Gees sy krag in my. Die Jordaanrivier was ‘n baie groot fisiese en psigiese grens in die Israeliete se wankelmoedige gemoed. Toe Josua gekonfronteer is met die Jordaanrivier, het hy nie teruggedeins nie, hy en die ander leiers het die eerste tree geneem in die waters as daad van gehoorsaamheid aan God. God reageer met ‘n wonder – die waters trek terug en die volk gaan deur. God maak dit vir hulle moontlik. Gehoorsaamheid ontsluit die mag en krag van God.

Ons gaan nou almal deur ‘n oorgangstyd. Wat anderkant hierdie tydperk wag, weet ons nie presies nie. Moenie wag totdat jy sterk en dapper voel om vorentoe te beweeg nie. Stap vorentoe in swakheid. Doen die regte ding ongeag jou vrese en gevoelens. So werk jy saam met die Heilige Gees. So ontwikkel jou geestelike karakter op ‘n onbekende reis.

In die groeiproses om soos Jesus te word, dra ek hierdie drie verantwoordelikhede:

  1. Kies om die ou maniere van doen te laat gaan (Efes 4:22) “hou dan op om te lewe soos julle vroeër gelewe het; breek met die ou, sondige mens in julle wat deur sondige begeertes verteer word.”
  2. Verander jou manier van dink  (Efes 4:23) “julle gees en gedagtes moet nuut word.” (Lees ook Rom 12:2)
  3. Trek die karakter van Jesus aan – deur nuwe gewoontes te ontwikkel (Efes 4:24) “lewe as nuwe mense wat as die beeld van God geskep is: lewe volkome volgens die wil van God en wees heilig”. Jou karakter is in werklikheid die somtotaal van jou gewoontes. Trek Jesus elke dag aan en beklee jou karakter met nuwe gewoontes.

Watter God-gegewe aksies het jy eenkant gesit, omdat jy swak en ontoereikend gevoel het? Watter ou gewoontes moet jy eenkant sit? Onthou! Dis elke dag Pinkster – die Gees leef elke dag in jou! Gee jouself oor aan Hom – volg sy leiding en werk saam met Hom, sodat Hy Jesus se karakter in jou na vore kan bring.


IS JY ‘N “WORRY-ER”?

Vandag vier ons die hemelvaart van Jesus. Hy het ons nie aan ons eie lot oorgelaat nie, want Hy het dadelik reëlings getref om sy Gees te stuur. Vader, Seun en Gees is by ons, midde-in ons huidige omstandighede. 

Ja, Covid-19 het ons skielik oorrompel. Ons het skaars Kersfees en Nuwejaar gevier, toe is hy op ons …en bekommernis is besig om sy tol te eis. Hier is die statistieke in die VSA – soos saamgestel deur die American Psychiatric Association. Amper die helfte van Amerikaners is angstig dat hulle dalk die virus sal opdoen. Amper twee-derdes is bekommerd dat ‘n familielid dit sal optel. Twee-derdes van mense is ook bekommerd oor die langtermyn implikasies ten opsigte van die ekonomie.

Hierdie statistiek kom nie as ‘n verrassing nie! Jy weet wat diep in jou eie hart aangaan. Het jy al voorraadopname gedoen oor jou eie “worries”? Dit kan nogal oorweldigend wees. Jy weet dit reeds, maar kan ek jou net weer herinner: bekommernisse sal jou niks in die sak bring nie. Jesus het vir ons kom sê in Matt 6:27: ”Wie van julle kan deur hom te bekommer sy lewe met een enkele uur verleng?”  Die antwoord is: Jy kan nie jouself verhoed om Covid-19 op te tel deur bekommernis nie. Bekommernisse sal ook nie keer dat my familie daardeur geraak word nie. “Worry” maak net ons probleme erger – jy neem nie ‘n tree nader aan die oplossings van jou probleme nie. Bekommernisse kan nie jou verlede of jou toekoms verander nie. Al wat dit kan doen is om jou vandag op te mors.

Spr 12:25 sê: “Bekommernis druk ‘n mens neer.”  Ons is nie gemaak om dit alles te verduur nie. Dit put jou uit tot in jou siel. Om op jou beste in hierdie tyd te funksioneer, gaan jou bekommernis jou beslis nie van hulp wees nie.

Hoe kan jy bekommernisse oorwin in hierdie seisoen van stres?

Laat Jesus jou Herder wees

Onthou jy het ‘n Herder! ‘n Herder neem die verantwoordelikheid vir die behoeftes van die skape: vir weiding, leiding en beskerming. Dis ook ons Goeie Herder se verantwoordelikheid. Daarom herhaal ek dit elke dag vir myself: “Die Here is my Herder – U is ‘n goeie Vader!”  Sê dit sommer baie keer op ‘n dag, want dit herinner my aan die feit dat ek ‘n goeie Herder het. Hy is die Jesus wat opgevaar het na die hemel en vir ons intree by die Vader. Deur sy Gees is Hy bewus van elke gedagte, emosie en beweging van elke spier en orgaan in jou liggaam. Hy is instaat en bekwaam om ‘n goeie Herder te wees.

Gee Jesus beheer van elke area van jou lewe

Bekommenisse is ‘n rooi liggie wat aangaan en jou herinner dat jy nog nie elke deeltjie van jou lewe aan God oorgegee het nie. Wanneer God nie nommer EEN is nie, sal jy begin bekommer in daardie aspek  van jou lewe. As jy iets meer as God liefhet, word dit ‘n bron van stres en angs in jou lewe. Dit is soos ‘n wonderlike kaggelvuutjie wat sy ruimte oorskrei, ‘n vonk wat op die sitkamer se mat beland en die potensiaal het om die hele sitkamer af te brand. Ook goeie dinge soos ons huwelike, kinders, ensomeer kan bronne van bekommernis word as dit vooropstaan in ons lewens. God het daarvoor ‘n bepaalde ruimte gegee in ons lewens. Dit mag nie daardie ruimte oorskrei nie. Wanneer iets of iemand God se plek begin inneem in ons lewens, skep dit onveiligheid en bekommernis.

Ontspan en gee vir God jou bekommernisse in gebed

Dis belangrik om altyd jou seëninge te tel. Veral in tye soos nou is dit goed om altyd jouself te herinner aan alles wat God al vir jou gedoen het. Maar dis ook belangrik om jou bekommernisse te tel. Soms het ons maar net ‘n algemene gevoel van angstigheid, maar ons weet nie wat dit veroorsaak nie. Voordat jy jou bekommernisse vir die Here kan gee, moet jy eers ‘n helder idee hê van wat dit is. Skryf dit neer – en gee dit een vir een vir God. Petrus sê: “Werp al julle bekommernisse op Hom, want Hy sorg vir julle”  (1 Pet 5:7). Jy is nie ontwerp om jou bekommernisse self te dra nie – dis onnatuurlik. God is groot en sterk genoeg om al jou bekommernisse te hanteer.

Vertrou God vir een dag op ‘n slag

Moenie dat bekommernisse jou toekoms kom steel deur more se bekommernisse  vandag te dra nie. Jesus het dit so gestel: “Moet julle dus nie oor môre bekommer nie, want more bring sy eie bekommenis” (Matt 6:34). Jy het genoeg op jou bord vir vandag. Moenie meer oplaai nie. Dis goed om te beplan vir more. Ons gaan tans deur ‘n baie unieke situasie deur ons ganse geskiedenis. Dit sal nodig wees om te beplan vir wat jou te doen staan in die dae, weke en maande wat kom. Jy kan beplan vir more, sonder om nou reeds te leef in jou more. Jy kan net vandag leef. God toets ons voortdurend oor hoe ons Hom vertrou. Hy wil hê ons moet besluit of Hy regtig die eerste plek in ons lewens inneem. Hierdie unieke stukkie geskiedenis is tans een van die grootste toetsinge wat ons dalk ooit in die gesig sal staar wanneer dit gaan oor ons vertroue in God. God het belowe dat Hy vir jou sal sorg. Hy sal in jou behoeftes voorsien.

Sal ek Hom vertrou daarvoor?

Groete

Gavin


Geloof en emosionele gesondheid!

Moenie in hierdie tyd emosioneel uitbrand nie. Hou jou tenkie vol en jou lewensvuurtjie aan die gang. Moenie opgee in moeilike tye nie.  “Don’t burn out! Keep yourselves fuelled and aflame . . . Don’t quit in hard times; instead pray all the harder.” Romans 12:11-12 (The Message). Hoe lyk ‘n geloof wat lei tot emosionele gesondheid gedurende Covid-19?  Kyk na hierdie volgende riglyne:

  • Betoon genade teenoor jouself en ander

Jak 4:6: “Maar die genade wat Hy gee, is nog groter. Daarom sê Hy:”God weerstaan hoogmoediges, maar aan nederiges gee Hy genade.”

  • Begin en eindig elke dag deur jou tenk weer vol te maak

Neem ootmoedig die Woord van God aan wat Hy in jou geplant het, want die Woord red ons (Jak 1:21). Dank God elke oggend vir sy liefde en elke aand vir sy getrouheid (Ps 91:2).

  • Hou by ‘n eenvoudige roetine

“Wees baie versigtig hoe julle lewe: nie soos onverstandige mense nie, maar soos verstandiges. Maak die beste gebruik van elke geleentheid, want ons lewe in ‘n goddelose tyd” (Efes 5:15-16).

  • Hou op om so baie nuus kyk nie

Matt 6:22-23: “Die lamp van die liggaam is die oog. As die oog goed is, sal jou hele liggaam lig hê. Maar as jou oog sleg is, sal jou hele liggaam sonder lig wees. As die lig in jou donker is, hoe donker  moet dit dan nie wees nie!”  Ps 119:37: ”Weerhou my van ‘n nuttelose lewe…”

  • Skeduleer ‘n gereelde verbintenis met mense wat jy liefhet

1 Tess 5:11: “Praat mekaar moed in en versterk mekaar dan met hierdie woorde.” “Speak encouraging words to each another. Build up hope so you’ll all be together in this, with no one left out, and no one left behind. I know you’re already doing this; just keep on doing it!” (The Message).

  • Deel jou gevoelens in plaas daarvan om ‘n prop daarop te sit

Gal 6:2: “Dra mekaar se laste, en gee op dié manier uitvoering aan die wet van Christus.” Jak 5:16: “Bely julle sondes eerlik teenoor mekaar en bid vir mekaar, sodat julle gesond kan word.”

  • Soek advies voordat jy groot besluite moet neem

Spr 15:22: “Waar daar nie beraadslaging is nie, slaag planne nie; dit slaag wanneer daar baie raadgewers is.”  Spr 11:14: “redding lê in baie raadgewers”.

  • Maak plek vir vernuwingsmomente deur jou dag

Jes 40:30-31: “Selfs jongmanne word moeg en raak afgemat, selfs manne in hulle fleur struikel en val, maar dié wat op die Here vertrou, kry nuwe krag. Hulle vlieg met arendsvlerke, hulle hardloop en word nie moeg nie, hulle loop en raak nie afgemat nie.”

  • Dien iemand wat meer ly as jy

Jak 1:27: “Egte en suiwer godsdiens voor God die Vader is om weeskinders en weduwees in hulle moeilike omstandighede by te staan en om jou skoon te hou van die besmetting van die wêreld.” Spr 11:25: “Wie ‘n ander voorspoed gun, sal self oorvloed hê. Wie die dors van ander les, sal self genoeg kry as hy dors is.”

  1.  Beheer die beheerbare en laat die res aan God oor

Jak 2:22 – tov Abraham: “Jy sien dus dat sy geloof met dade gepaardgegaan het en dat dit eers deur dade volkome geword het.”

Hou jouself innerlik gesond – kyk mooi na jouself!


'n Sterk fondament!

Hierdie tyd verg ‘n geloofshuis met ‘n stewige fondament. Die winde waai, die storms woed – en my geloofshuis moet hou. Ons voel onseker oor baie dinge. Ons beleef soms emosies wat ons ondertoe wil trek, na wanhoop en moedeloosheid. Elkeen van ons beleef dit anders. Vir sommige is dit ‘n tyd van rus en ontspanning. Vir ander pak die donker wolke saam as hulle dink oor hoe hulle vorentoe moet oorleef.

My geloofshuis het ‘n sterk en stewige fondament nodig. Vir die goeie tye en vir die Covid-19 tye. Ons moet juis die goeie tye benut om sterk huise te bou op ‘n stewige fondament, sodat dit kan hou in die stormtye. 

Jesus vertel in Matteus 7 die verhaal van twee bouers; die een was wys en die ander een was dwaas. Die dwase man het sy huis net op sand gebou. Toe die storms kom het die huis ineengestort. Jesus verwys hier na mense wat sy waarhede hoor en ontvang, maar dit nie laat oorgaan na die praktyk van hulle lewens nie. Hulle maak nie daardie waarhede die praktyk van hul lewens nie. Hulle gaan doen dit nie. Hulle is soos hierdie dwase bouer wat op sand bou.

Die wyse bouer het egter sy huis op rots gebou. Toe die winde en storms kom het sy huis sterk gestaan. So is die persoon wat nie net Jesus se woorde hoor en ontvang nie, maar dit ook in praktyk gaan doen en uitleef.

In elke tyd het my geloofshuis ‘n sterk fondament nodig. Dit beteken dat ek goed sal nadink oor wat Jesus vir my sê, ook in hierdie Covid-19 tyd. Oor myself, my eie lewe, my vrese en bekommernisse, die onnodige skadelike dinge waaraan ek vashou, die dinge wat die mense om my raak, my kinders, kleinkinders, skoonkinders, ouers, skoonouers, broers en susters en ander familielede, my kollegas, my vriende, my verlede, my hede, my toekoms, my werk, my planne, drome en vooruitsigte. Jesus roep my op om sekere dinge af te lê en seker dinge te omarm. Daar is sekere dinge wat ek moet los, en sekere dinge wat ek van Hom moet ontvang en koester. Wat is daardie dinge vir jou? Dis gaan die verskil maak of ek in hierdie tyd geestelik gaan groei of nie. Dit gaan bepaal watter tipe fondament ek onder my geloofshuis gaan bou. Sal die fondament sand wees, of die Rots, Jesus!

Jakobus het nogal baie klem gelê om die praktiese deel van ons geloof, dat ons die woorde van Jesus ter harte moet neem, dit sal uitleef en sal doen, omdat dit vir ons die weg baan tot ware innerlike vryheid en vrede. In die eerste hoofstuk noem Jakobus drie voorbeelde van hoe ons God se waarhede in praktyk kan uitleef:

1. Jou tong sal onder beheer wees! “As iemand dink hy is godsdienstig, maar hy hou nie sy tong in toom nie, bedrieg hy himself. Sy godsdiens is waardeloos.” (Jak 1:26).

2. Jy sal ‘n omgee-hart hê!  “Egte en suiwer godsdiens voor God die Vader is om weeskinders en weduwees in hulle moeilike omstandighede by te staan”. (Jak 1:27)

3. Jy sal ‘n skoon gemoed hê!  “en om jou skoon te hou van die besmetting van die wêreld.”  (Jak 1:27)

Hierdie dinge is bewyse van ware Christen-wees. Dis juis die dinge wat ons nou in ons binneste en in ons huise moet begin beoefen: ‘n Gees-beheerde tong, ‘n omgee hart vol medelye en ‘n skoon en rein gemoed, vry van negatiwiteit en angs. In Joh 13:17 sê Jesus vir sy dissipels: “Julle weet dit nou; gelukkig is julle as julle dit ook doen.” 

Kan jy sien wie is die gelukkige en geseënde mense? Dis hulle wat doen wat Jesus sê. Die seëninge van die hemel word op jou uitgestort wanneer jy dit doen. Ons kan verseker hiervan wees – dat ons baie baie, baie meer weet van God se waarhede as wat ons nou uitleef….Daarom begin vandag waar jy is met die mense wat saam met jou is! Begin sommer nou daar! Begin om dit te beoefen wat jy nou reeds weet. Soos wat jy meer begin weet, doen dit ook sommer! Nou is die tyd om ons geloof in praktyk oor te sit. Ek oefen dit in by my huismense rondom my. So bou ek my geloofshuis op ‘n baie stewige fondament, want ek volg Jesus in sy woorde.

Groete vir eers!

Gavin