Garsfontein Gemeente se Plan van aksie!

Ons groet al ons gemeentelede,

In die lig van President Ramaphosa se aankondiging gisteraand aan Suid-Afrika rakende die Covid-19 virus, het die Leraarbediening vanmôre besluit om die volgende interimreëlings bekend te maak rakende ons gemeentelike byeenkomste vir die volgende maand.

  • Dis vir ons as gemeente belangrik om in te val by die noodmaatreëls soos aangekondig deur die President, ter wille van ons almal se algehele welsyn.
  • Ons het geoordeel dat dit ook belangrik is om gedurende hierdie tyd as gemeente bymekaar te kom by eredienste, sodat ons mekaar kan bemoedig en vir mekaar, ons land en die wêreld kan bid rondom hierdie pandemie. Ons stap saam met Jesus op sy lydensweg in ‘n baie moeilike tyd in die wêreld se bestaan. Ons wil onsself nie onnodiglik isoleer van mekaar nie, behalwe as ons simptome manifesteer. Ons wil egter ons getalle tydens die oggenddienste beperk soos voorgeskryf deur die President.
  • Daarom sal ons vir die sondae wat kom twee kort agtereenvolgende oggenddienste hou, te wete om 08:00 – 08:30 en dan ook vanaf 09:00-09:30. Dieselfde geld vir Paasnaweek se eredienste. Die nagmaal op Goeie Vrydag sal dalk bietjie langer duur maar daar sal twee dienste wees die oggend waarby by albei dienste nagmaal bedien sal word. Dieselfde predikers sal dieselfde dienste met dieselfde temas herhaal.
  • Van ons kant sal ons ons beste doen om oppervlaktes by die kerk te saniteer. Ons sal ook by die ingangsportaal saniteer-geriewe aanbring.
  • Verder wil ons mekaar sterk ontmoedig om met die hand te groet – groet liewers met die elmboog, indien enigsins nodig.
  • Sit ook sover moontlik verpreid in die kerk en handhaaf ‘n gesonde afstand van mekaar.
  • Bly waaksaam, bly veilig en gesond. Probeer streng te hou by die voorskrifte rondom persoonlike higiëne.
  • Omdat hierdie kritiese tye is, is dit belangrik dat ons die erns van die situasie in gedagte sal hou.
  • Laat weet die kerkkantoor indien jy ondersteuning benodig.
  • Ons sal voortgaan met die twee oggenddienste tot verdere kennisgewing en riglyne van die owerhede.

 – Die inligtingsessie van Dr Maniraj Sukdaven wat op 17 Maart sou plaasvind word uitgestel na 28 April.  Dit sal dan ook die eerste Woordsterk sessie wees van die nuwe kwartaal.

– Die Diamante se Tradisionele ete wat op 19 April sou plaasvind is ook gekanselleer! Hulle sal dit herskeduleer na ‘n nuwe datum.

 – Die familiefees van 5 April word gekanselleer.


Vertrou God se doel!

In die lydenstyd word ons opnuut bewus van Jesus se weg van lyding. Sy lyding herinner ons ook aan ons eie lyding. Ons eie lyding wissel van mens tot mens. Dis belangrik om altyd te onthou: vertrou God se doel met jou lewe in die moeilikste tye. God se doel met jou lewe is altyd groter as jou probleme.

“Om hierdie rede word ons nie moedeloos nie. Al is ons uiterlik besig om te vergaan, innerlik word ons van dag tot dag vernuwe. Ons swaarkry in hierdie lewe is maar gering en gaan verby, maar dit loop vir ons uit op ‘n heerlikheid wat alles verreweg oortref en wat ewig bly.” (2 Kor 4:16-17)

“This is the reason why we never collapse . . . These little troubles (which are really so transitory) are winning for us a permanent, glorious and solid reward out of all proportion to our pain.” (Phillips)

Hoekom ek? Wanneer die lewe in sy harde werklikheid gebeur sal die meeste mense uiteindelik hierdie vraag vra. Maar dis die verkeerde vraag om te vra tydens donker dae. Vra liewer: “Here, wat is U doel met dit alles?”

In 1 Pet 1:6-7 lees ons: “Verheug julle hieroor, selfs al is dit nodig dat julle ‘n kort tydjie bedroef gemaak word deur allerhande beproewings sodat die egtheid van julle geloof getoets kan word. Julle geloof is baie kosbaarder as goud, goud wat vergaan.”

Niks gebeur in jou lewe per toeval nie. God is nie die oorsprong van kwaad nie, maar Hy kan die goeie uit elke situasie na vore bring, selfs uit kwaad. Beproewinge en toetsinge openbaar jou karakter, jou geestelike volwassenheid, jou sekuriteit, jou waardes en geloof.

Paulus het sy hele lewe daaraan toegewy om God te dien. Sy lewe het soms maar erg uitgedraai; hy is gestenig, hy was ‘n skipbreukeling, hy is geslaan – vir dood agtergelaat, in die gevangenis gegooi, beroof. Ons kan nie agterkom dat hy ooit bitter was nie. In plaas daarvan dat hy gevra het: Hoekom ek Here?”, het hy Hy geglo dat God met dit alles ‘n doel gehad het. Hy het geleer om God te vertrou te midde van sy probleme, al het hy nie verstaan nie.

Wat is die geheim van sy volharding? Hy het aan die hoop vasgehou omdat God ‘n doel gehad het met sy probleme. God het ook ‘n beloning gereed gemaak wat die pyn by verre oortref het. Toe Jesus aan die kruis gesterf het, het sy volgelinge gedink dis ‘n sinnelose tragedie, ‘n groot fout. Hulle kon nie sien dat God nogsteeds op sy troon sit nie, besig om sy groter doel uit te voer. Na sy opstanding het Jesus aan sy dissipels verskyn en vir hulle sy vrede gegee: “Soos die Vader My gestuur het, stuur Ek julle ook.”

Net oomblikke tevore kon hulle geen rede sien vir hul pyn en verlies nie. En hier kom Jesus en vertel hulle van hul nuwe opdrag wat deel sou vorm van God se groot doel. God se doel met jou lewe is altyd groter as jou probleme. Vertrou Hom! Hy verander kruisigings na opstandings. Hy spesialiseer in hopelose situasies.


DIE MISTERIE VAN MY BESTAAN

“Die Here het aan my verskyn uit die verte: Ja, Ek het jou liefgehad met ’n ewige liefde; daarom het Ek jou getrek met goedertierenheid.”  (Jer 31:3)

In die Lydenstyd word ek bewus van my eie verganklikheid, dat my fisiese bestaan op aarde, my tydelik en sterflik is. Maar ek word ook aan die ander kant bewus van my onverganklikheid. Ek omarm albei hierdie werklikhede – hierdie twee saam is deel van die misterie van my lewe en bestaan hier op aarde. Hoe meer ek daaroor nadink, hoe meer word ek bewus van skuiwe in my binnewêreld as beelddraer van God.

Ek is ewig – en dit is wonderlik om dit te weet. My lewe het nie ‘n einde nie! Wanneer ek sterf is dit nie nie einde van my nie. As gelowig gaan ek vir altyd lewe in die nuwe hemel wat kom. Nie noodwendig op dieselfde manier as nou nie, maar saam met al my ander Christenpelgrimsreisigers glo ek dat ek in hierdie ewigheid, deur God se genade, altyd saam met Hom gaan wees.

My lewe het ook nie ’n begin nie!

Die grootsheid van my ewig-wees is meer as net my lewe na die dood. Volgens die

Joodse tradisie bestaan ek al lankal, nog vóór my konsepsie. My konsepsie was

maar net die begin van my aardse lewe wat deur die dood tot ’n einde kom. Dié

gedagte val effens vreemd op my oor, en soos baie ander Christene is ek geneig

om nie baie van my vooraardse bestaan te maak nie.

Dít is die misterie van my bestaan – ek is uit God, ek kom van Hom af, ek leef as gelowige deur God en vanuit God se lewe en krag en ek sal weer tot God

terugkeer. Wat ‘n grootse gedagte – dit gaan my verstand te bowe – God se liefde strek verby my aardse lewensduur en denke.

In die Lydenstyd wil ek van hierdie misterie ervaar hier in my binneste. Die Here het vir jou en my lief met ‘n ewige liefde, daarom het Hy my in die lewe ingestuur met die doel om Hom te eer en verheerlik vir solank ek op die aarde is.


LYDENSTYD HET BEGIN

Die Lydenstyd (Lent) het amptelik gister begin met Aswoensdag. Komende Sondag is ons by die tweede Lydensondag. Jesus se versoeking in die woestyn vir 40 dae dien as agtergrond en patroon vir die Lydenstyd. Dit duur vir sewe weke tot en met Goeie Vrydag, waar ons Jesus se kruisdood gedenk. Op Paassondag vier ons Jesus se opstanding uit die dood en die nuwe lewe wat Hy vir ons daardeur moontlik maak.

Tydens die Lydenstyd word sewe kerse doodgeblaas, elke sondag ‘n kers. Die simboliek is om geleidelik van lig na donker te beweeg namate die herdenking van Jesus se kruisdood nader kom. Op Goeie Vrydag word die laaste kers geblus en is daar donkerte en stilte. Op Paassondag word al die kerse weer aangesteek, asook die groot Christuskers as viering van Jesus se opstanding uit die dood.

Met die oog op die begin van die Lydenstyd, kyk ons na die volgende gedig van Jean M. Watt met die titel: Lent

Lent is a tree without blossom, without leaf

Barer than blackthorn in its winter sleep,

All unadorned. Unlike Christmas which decrees

The setting-up, the dressing-up of trees,

Lent is a taking down, a stripping bare,

A starkness after all has been withdrawn

Of surplus and superfluous,

Leaving no hiding place, only an emptiness

Between black branches, a most precious space

Before the leaf, before the time of flowers;

Lest we should see only the leaf, the flower,

Lest we should miss the stars.

Watt se gedig vergelyk die Lydenstyd met ‘n boom wat al sy blare en blomme verloor het. Dit is ‘n tyd om onsself te stroop van die geraas van ons lewe en om ons bewussyn weg te draai van die dinge wat ons lewe, tyd en gedagtes op ongesonde maniere opneem. Daar is iets dor rondom ‘n kaal boom in die winter. Dalk verkies jy om die lentebloeisels te sien, of die groenigheid van die somer, of die goue blare van herfs. Tog, kry ons ‘n ander beeld van dorheid wanneer ons met dankbaarheid van die groter prentjie bewus raak – selfs bewus raak van die moontlikheid om sterre deur leë takke raak te sien. Lent is ‘n tyd wanneer ons kies om verby die dinge te kyk wat ons lewe volmaak, verby gemak en plesier en sekuriteit sodat ons die diepte van ‘n vervulde lewe kan ontdek. Hier is ‘n geleentheid om ons lewe te stroop na die basiese, die nodige, om die simplistiese te geniet, te fokus op die betekenis van lewe en weg te draai van dít wat ons innerlike wêreld – ons siel versmoor. Stap saam en beleef die Lydenstyd op ‘n nuwe manier!


SONDER LIEFDE IS DIT TYDMORS

1 Kor 13:1 “Al praat ek die tale van mense en engele, maar ek geen liefde nie, het ek ‘n stuk klinkende metaal, ‘n galmende simbaal geword.”

Liefde is ons grootste doel hier op aarde. Ons is hier geplaas om te leer om God en ander lief te hê. Paulus beskryf aan ons in 1 Kor 13 waarom die liefde die belangrikste waarde is.

  • Sonder liefde is alles wat jy sê ondoeltreffend. Woorde sonder liefde is net geraas. Mense verwerp liefdelose woorde, maar hulle sit regop, luister en reageer op woorde wat in liefde uitgespreek word.
  • Sonder liefde is alles wat jy weet onvolledig. 1 Kor 13:2 “Al het ek die gawe van profesie en ken ek al die geheimenisse en besit ek al die kennis….maar ek het geen liefde nie, dan is ek niks.”  Die wêreld ontplof van al die informasie en kennis. Tog word baie van ons mees basiese probleme nie opgelos nie, want die wêreld soek nie na meer kennis nie, maar na liefde.
  • Sonder liefde is alles wat ek glo onvoldoende. 1 Kor 13:2 “al het ek al die geloof om berge te versit, maar ek het geen liefde nie, dan is ek niks.” Baie mense het die wanpersepsie dat christenskap net gaan oor die glo van sekere waarhede en leerstellinge. Die vraag is egter: het jy Jesus lief? Besef jy dat Hy jou liefhet? Christenskap gaan daaroor dat ek Christus se liefde sal ervaar – en om te leer om soos Hy lief te hê.
  • Sonder liefde is alles wat jy gee betekenisloos. 1 Kor 13:3 “Al deel ek al wat ek het aan ander uit…maar ek het geen liefde nie, baat dit my niks.” Daar is allerhande motiveringe waarom mense gee, soos ‘n gevoel van verpligting, prestige of skuld. Net omdat jy gee beteken nie dat jy dit doen in liefde nie. Jy kan gee sonder om lief te hê, maar jy kan nie liefhê sonder om te gee nie.
  • Sonder liefde is alles wat jy bereik onvoldoende. 1 Kor 13:3 “al gee ek my liggaam prys om my daarop te kan roem, maar ek het geen liefde nie, baat dit my niks.” Jy kan baie prestasies behaal het in hierdie lewe. Jy kan selfs jou lewe offer vir die Koninkryk van God, maar sonder liefde is dit ‘n vermorste poging. Jy kan die gawe hê om welsprekend te wees, die kennis van ‘n genie, die geloof van ‘n wonderwerker, die vrygewigheid van ‘n filantroop, die toewyding van ‘n martelaar – maar as jy nie liefde het nie, tel dit absoluut niks. Die goeie nuus is egter – jy kan ander liefhê omdat God jou eerste liefgehad het. Soos wat jy leef binne sy liefde sal Hy jou help om ander lief te hê. Wanneer jy nader aan Hom beweeg, sal jou vermoë om lief te hê toeneem. Hy maak dit moontlik om hierdie roeping tot liefde vir ander uit te leef.

BLY EMOSIONEEL GESOND

Ek en jy het ook ‘n innerlike lewe – dit gaan oor alles wat ons dink en voel in ons binneste. Soms wys ons dit mense – soms steek ons dit weg. Meestal wys dit in ons optrede, ons gesindheid, ons woorde en dade. Emosies is die barometer van die siel. Dit wys vir ons hoe dit hier binne gaan. Dis belangrik om binnekant gesond te bly, selfs te midde van turbulensie. Daarom is dit so belangrik om ons gedagtes doelbewus te rig op die goeie dinge, die teenwoordigheid, liefde en gawes van God, sy Woord, sy sorg! Wanneer ons op dit alles fokus, kom die emosies ook naderhand in lyn met die gedagtes.

Spr 17:22 sê: “ ’n Vrolike mens is ‘n gesonde mens, ‘n neerslagtige mens raak uitgeput.” Die GNT vertaling stel dit so: “Being cheerful keeps you healthy”.

Jou liggaam sal baie gou vir jou laat weet wanneer jy fisies herlaai moet word. Jou maag grom – dit is tyd vir eet. Jou ooglede raak swaar – dis tyd vir slaap. Ons kyk egter dikwels die ander tekens mis wat vir ons sê dat ons ‘n emosionele herlaai nodig het: ‘n gevoel van oorweldiging, ‘n kort lont, ‘n ongeduldige uitbarsting of om mense te vermy… Jy het geen begeerte om mense lief te hê wanneer jou emosionele tenk laag is nie. Om aan te hou om die oorvloedige lewe te leef, ‘n lewe van vryheid en liefde is dit belangrik om jou emosionele tenk vol te hou. Hoe doen mens dit?

Beplan vir ‘n bietjie alleentyd. Jesus het dit gereeld gedoen – Hy het onttrek aan die skares om emosioneel te herlaai. Lees maar Mrk 6:31 in hierdie verband. Mense wat altyd beskikbaar is, is nooit volledig beskikbaar nie, tensy hulle tyd maak om te rus.

Probeer vasstel watter aktiwiteite in jou lewe vir jou nuwe energie verskaf – wat is die dinge wat jou batterye herlaai. Dit wissel van mens tot mens want ons is verskillend “bedraad”. Dalk is dit ‘n stokperdjie, om met jou hande iets te doen, ‘n sport, ‘n kunsaktiwiteit, ‘n speletjie, leeswerk, musiek luister, stap of net stilwees êrens. Maak tyd hiervoor in jou besige skedule. Kuier kan ook baie terapeties wees vir sommige mense. Matt 11:19 verwys na Jesus wat te midde van ‘n baie besige lewe geëet en gedrink het. Hy het sover Hy kon sy lewe op aarde geniet. Die Fariseërs het selfs na Hom verwys as ‘n vraat en ‘n wynsuiper…! Ons is nie geskep om die hele tyd uitgeput te wees nie.

Ontwikkel die gewoonte van lag. Wanneer jy lag vermeerder die getal T-selle in jou liggaam. Dit verhoog jou immuniteit en stel endorfiene vry in jou brein. Om te lag is goed vir jou gesondheid. So begin jy die lewe meer geniet, maar dit help jou ook om ander goed lief te hê.


‘N GROOT VOORBEELD OF ‘N GROOT ERFLATING

Pred 5:14: “ Self gaan hy kaal uit die wêreld uit soos hy daarin gekom het. Hy kan niks met hom saamneem vir al sy inspanning nie.”

Het jy al ooit gewonder, na die dood van ‘n ryk persoon: hoeveel het hy of sy aan  hul familie agtergelaat. Soms lees ons van sulke erflatings in die koerante. Kan ek vir jou ‘n geheim vertel? Hulle het dit álles agtergelaat!

As ek geen krediet gaan ontvang in die hemel vir al die skatte wat ek hier op die aarde bymekaar gemaak het nie, wat is dan die doel om dit alles so te versamel hier op die aarde?

Sommige oordeel dat hulle al hul rykdomme aan hul kinders sal agterlaat. Meeste mense doen dit ook so. Dit help om ons kinders ‘n goeie hupstoot in die lewe te gee. Baie kinders het groot waardering daarvoor en tree op verantwoordelike wyse op met daardie erflating.  Studies het egter ook aangetoon dat , in meeste van gevalle het groot oorgeërfde rykdomme groter skade as goed gedoen aan die volgende generasie.  Inc tydskrif het ‘n paar jaar gelede ‘n artikel gepubliseer rondom die vraag of ouers al hul geld moet oorplaas na die volgende generasie. Hulle het kinders van entrepreneurs ondervra. Meeste van hulle het geantwoord dat hulle dit sou verkies dat hul ouers aan hulle eerder die kennis van hoe om geld te bekom, moes agterlaat,  as die geld. Hulle wou, met ander woorde, nie die resultate van hul ouers se arbeid gehad het nie, maar die voorbeeld van hul arbeid. Hulle het verstaan dat mens nie kan waardeer waarvoor jy nie gewerk het nie. Oorgeërfde rykdom het ‘n geneigdheid om onverantwoordelikheid te kweek. Kyk maar hoe reageer mense wat groot bedrae geld gewen het. Meeste kan dit glad nie hanteer nie want hulle het nie daarvoor gewerk nie.

Koning Salomo het groot rykdomme aan sy kinders nagelaat. Hy staan nogal uit as ‘n man in die geskiedenis wat baie rykdomme versamel het. Hy het alles aan sy seun nagelaat – sy rykdomme, sy heerskappy, sy koningskap, sy mag. Dit het egter sy seun se lewe geruïneer. Rehabeam was ‘n morele mislukking wat nie dit kon bestuur waarvoor hy nie gewerk het nie. Dit laat mens nogal dink!

Dis nie ‘n sonde om geld te maak nie. Die vraag is egter, wat gaan ek met dit alles maak? Hoe gaan ek dit bestuur en wat gebeur daarmee nadat ek nie meer daar is nie. Hierdie is kritiese vrae vir ons. Dit blyk nie goed te wees om rykdomme op te gaar om dit aan ander gee wat dit nie sal kan hanteer nie. Leer eerder om jou geld nou met wysheid en oorleg te bestuur. Fokus daarop om die geld wat jy het (of dit baie of min is), aan te wend om mense in die hemel te kry! Laat vir jou nageslag ‘n voorbeeld na van vrygewigheid. So sal jy ‘n ewige belegging maak wat vir altyd van waarde sal wees.


Vyf Kernwaarhede wat jou sal vry maak!

Die gebeure in ons erediens op doopsondag, het my opnuut laat nadink oor die vyf kernwaarhede wat die Franciskaanse teoloog Richard Rohr ‘n tyd gelede gedeel het. Wanneer ons hierdie waarhede aanvaar, bring dit ongekende vrede en vryheid. Ons leef in ‘n selfgesentreerde tyd waar mense al meer op hulself fokus. Hierdie waarhede is goeie medisyne ten opsigte van meer realistiese verwagtinge in ‘n beperkte en onvolmaakte wêreld. Dink goed na oor die volgende:

  1. Die lewe is hard

Ons lewe in baie gemaklike tye met baie geriewe rondom ons. Ons hou nie van ongerief en lyding nie. Ons voorouers het verstaan dat lyding deel van hul lewens was. Wanneer ek besef en aanvaar dat die lewe soms hard kan wees, berei dit my voor om swaartye met grasie te hanteer. Dit bring ‘n vreemde soort vrede. Ons word vry van onrealistiese verwagtinge. Ons word dankbaar vir die vreugdes wat ons beleef (Joh 16:33).

  • Jou lewe gaan nie oor jou nie.

As jy God wil laat glimlag, vertel Hom van jou planne. Hy het dalk ander planne vir jou. Soms dink ons dat ons lewens net gaan oor dit wat ons wil doen. My lewe raak ook God – en ander mense om my. Ware geluk kom nie wanneer ek begin kry wat ek wil hê nie, maar wanneer ek die Here begin vra wat Hy wil hê. Ek volg nie my eie ster nie, maar vir God. Dis waar ware vrede te vinde is. Dit sal goed wees om uit te vind hoe pas ek by God se plan in, nie waar pas Hy by my planne in nie (Matt 6:33).

  • Jy is nie in beheer nie.

Beheer is ‘n illusie. Ek mag dink ek is in beheer, maar dis nie waar nie. More mag nooit kom nie. Ons pogings om te beheer en uitkomste te manipuleer is komies en dikwels skadelik. Beheer bring maar net meer angs en woede. Dit bring ‘n vreemde rustigheid wanneer jy besef jy kan nie alles beheer nie. Dit maak jou ‘n slaaf wanneer jy kommer oor onvoorspelbare dinge. Om te te laat gaan, is bevrydend (Jak 4:13-16).

  • Jy is nie so belangrik nie.

Ek het gedink die hele wêreld draai om my. Ek het gedink dis net my gevoelens en gerief wat saak maak. Natuurlik het God my besonders lief, maar ek moet besef dat Hy ander ook net so liefhet. Daarom moet ek hulle respekteer. Die harde waarheid is dat ander mense soms belangriker is as ek. Hulle het my aandag en liefde intens nodig. Ek staan terug en dien hulle met Jesus se liefde. Die wêreld is nie daar net vir my nie. Wanneer ek dit verstaan en aanvaar, bring dit ongekende vrede en vryheid. Nou kan ek ook ander mense se belangrikheid vier (Fil 2:3).

  • Jy gaan sterwe.

Dis hard, maar waar! Gaan stap vir ‘n slag deur die begraafplaas. Hulle wat daar te ruste gelê is was ook almal, soos ek en jy,  opgewerk oor wat die lewe na hulle gegooi het. Hulle stryde is nou verby! Indien hulle getrou was, sal hulle nou by God wees. Hulle besef nou dat swaar tye nie vir altyd hou nie. Dus, maak gereed om God te ontmoet. Dis is my dringendste prioriteit. Dit maak ons vry van die oordrewe en teenstrydige eise van die wêreld om ons. Ons fokus op die één ding wat ons moet doen. My lewe word eenvoudiger en ek neem die lewe nie so ernstig op nie. Dit alles sal verbygaan.

Dink na oor hierdie waarhede. Trek hulle weer nader wanneer die lewe hard en vinnig na jou toe kom met sy agenda van beheer, self-belangrikheid, leë beloftes en perfekte gerief op die aarde. ‘n Eenvoudige, sober, nederige en gefokusde lewe bring vrede en vryheid.


Dis ons almal se basaar!

Dit was nog altyd ons almal se basaar – so sal dit ook volgende Vrydag wees. Ons is baie dankbaar vir ‘n doeltreffende basaarkomitee wat die leisels vashou en voorvat, maar almal van ons gaan ‘n belangrike bydrae lewer tot die lekker en sukses van die basaar. Hoekom? Want dis ons almal se basaar! Ons is almal deel van Garsfontein Gemeente en almal van ons gaan iewers ‘n funksie vervul om daarvan ‘n heerlike ervaring te maak.

Die Hebreërskrywer noem dat ons as gelowiges spesiaal afgesonder is en deelgenote is van die hemelse roeping (Heb 3:1). Jy kan nie God se roeping vir jou lewe op jou eie vervul nie. My roeping staan altyd in verband tot die christen-gemeenskap, want ek is deel van ‘n geestelike familie.

Dis soos die dele van ‘n fisiese liggaam. Liggaamsdele is waardeloos, tensy dit verbind is tot die ander liggaamsdele. Jy mag dalk ‘n uitstaande begaafde oog hê wat jou instaat stel om uitstekend te sien. Maar ‘n oogbal wat nie verbind is tot jou liggaam nie, is waardeloos want dit kan niks sien nie.

Jy mag dalk ‘n uitmuntende begaafde oor hê wat alles om jou fyn kan hoor, maar as jou begaafde oor nie verbind is tot jou liggaam nie, help dit jou niks.

Op dieselfde wyse moet jy verbind wees tot die liggaam van Christus ten einde jou roeping te vervul. “Daar is net één liggaam en net één Gees, soos daar net één hoop is waartoe God julle geroep het” (Efes 4:4).

Ek en jy word geroep om ons roeping te vervul binne en vanuit die gemeenskap van gelowiges, daar waar ons saamwerk en mekaar ondersteun. Dink net hoe die oog en oor in jou liggaam saamwerk om jou liggaam te ondersteun. So is al die gelowiges heilige vennote, deelgenote van ‘n hemelse roeping (Heb 3:1).

As jy weer by die kerk kom, kyk ‘n bietjie rond. Die mense wat jy daar gaan sien is heilige deelgenote – “holy partners” – van God se roeping in jou lewe. Jy is geroep en elke ander persoon wat jy daar gaan sien is ook geroep – julle word saam geroep om God se hemelse roeping te vervul.

Dit gaan ons ook sien volgende Vrydag met die basaar. Ons almal is daar geroep om ons gawes in diens van die hele liggaam aan te wend – sodat ons daar God se gawes kan geniet en waardeer.

Bring jou roeping, jou gawes, jou tyd en energie, jou glimlag, jou vriendelike woord en bedien die liggaam met jou oog, jou oor, jou mond, jou glimlag, jou hand, jou hart!


SOMS MOET JY “NEE” SÊ

As jy regtig wil groei, moet jy soms “nee” sê. Die skrywer van die Hebreërbrief moedig ons aan om langs ons geloofsreis alle laste en sonde van ons af te gooi sodat ons kan volhard in die wedloop van die geloof met ons oë gevestig op Jesus (Heb 12:1).

‘n Uiters belangrike woord wat ek moet onthou vir my geestelike reis deur die lewe is ‘n onverwagse woord: “nee”. Jou geloofsreis is ‘n lang reis. Baie reisigers begin baie goed, maar begin weg te kwyn teen die einde. God wil hê dat jy die volle afstand moet voltooi. Hy wil hê dat jy sterk sal klaarmaak!

Jy het ‘n lang maraton voor jou. Jy kan nie die hele ent draf met ‘n swaar gewig in jou hande nie. Hoe sal jy vaar as jy die hele pad ‘n barbell in die jou hande moet dra? Mense los dikwels die geloofswedloop vanweë al die dinge wat hulle saamdra. Dit maak hulle moeg dat hulle alles wil los. Daarom is dit nodig dat ons sal de-clutter.

‘n Passasierskip kan redelik spoed optel in die water. As jy ‘n 100 lewensbootjies daaraan vasmaak, sal dit stadiger gaan. Dit gebeur wanneer ons probeer om te veel te doen. Ons sal moet leer om “nee” te sê vir sekere dinge wat dalk ook goed kan wees, maar dit weerhou ons daarvan om ons beste te doen.   Die NLT stel dit so: “Let us strip off every weight that slows us down”.

Gewigte is nie sleg nie – mens kan jou spiere daarmee oefen en fiks word. Dis ook nie sondig nie – dit het ‘n nut en plek op sy tyd. Dis net onnodig vir ons aardse geestelike reis. Dalk is dit ‘n sekere werk waarmee jy besig is, ‘n verhouding wat jou energie tap, ‘n stokperdjie wat baie tyd in beslag neem. Dalk is dit die koerant – en nuus, nuus, nuus van die more tot die aand. Jy kry net die genoeg van die nuus, van die radio, van die TV nie. Dis iets wat jou weghou van die wedloop – dit hou jy terug en verhoed dat jy voluit kan gaan. Dit staan in die pad van dit wat God in jou en deur jou wil doen. Is dit die moeite werd? Nee!

Daarom is dit goed om mooi te dink oor die dinge wat my terughou – wat my laat afdwaal, wat my energie onnodiglik tap, met die gevolg dat ek nie kan volhard in die wedloop van die geloof nie. Dalk sal dit nodig wees om “nee” te sê, sodat jy opnuut weer kan “ja” kan sê vir God en sy doel met jou lewe. Hy wil hê dat jy sal floreer, dat jy sal groei om vry te wees om Hom te dien. Wat is die gewigte waarvoor jy moet “nee” sê?


Geestelike hand-higiëne!

COVID-19 – Uitdaging of geleentheid?

Liewe Garsfontein gemeentefamilie

Op 15 Maart 2020, het president Cyril Ramaphosa,  ‘n dringende oproep tot alle Suid Afrikaners gerig om saam te werk in die stryd teen die Corona-Virus (COVID-19). Een van die maatreëls wat ingestel is, is ‘n algehele verbod op samekomste wat meer as 100 mense behels, aangesien sosiale distansiëring een van die doeltreffendste voorsorgmaatreëls vir die verspreiding van die COVID-19 virus is. As geloofsfamilie, is ons gemeente by hierdie oproep ingesluit en is die welstand van alle mense vir ons belangrik. Hierdie maatreëls hou besliste uitdagings vir ons gemeente, veral ten opsigte van ons samekomste as geloofsfamilie in.

Ons erken die behoefte van gelowiges om in hierdie tyd juis die gemeenskap van gelowiges te beleef. Alhoewel die nuutste navorsing daarop dui dat infeksie in meeste gevalle nie tot ernstige simptome lei nie, dit nogtans gevaar vir ‘n spesifieke deel van ons samelewing inhou. Ons wil elke moontlike voorsorg tref om verspreiding te probeer bekamp, sodat die mees weerlose onder ons na die beste van ons vermoë beskerm kan word. Ons bely ons vertroue in die HERE se sorg en beskerming in hierdie uitdagende tye, asook ons oortuiging dat die HERE ons deur Sy Gees aanspoor om ons naaste lief te hê, soos onsself soos dit in Filippense 2:1-5 geskrywe staan:

Aangesien julle die troos in Christus ondervind het, die aansporing deur die liefde, die gemeenskap deur die Gees, die innige meegevoel en meelewing – maak dan nou my blydskap volkome deur eensgesind te wees: een in liefde, een van hart, een in strewe. Moet niks uit selfsug of eersug doen nie, maar in nederigheid moet die een die ander hoër ag as homself. Julle moenie net elkeen aan sy eie belange dink nie, maar ook aan dié van ander. Dieselfde gesindheid moet in julle wees wat daar ook in Christus Jesus was…

Om hierdie rede is besluit op die volgende reëlings en doen ons ‘n oproep aan die hele gemeente, om ons hierin te ondersteun, dat u uself sal beskerm, ander se vrese sal respekteer en dat ons steeds as kerk diensbaar sal wees tot mekaar en ons gemeenskap.

Eredienste en ander samekomste

Om hierdie rede is daar besluit dat, tot en met verdere kennisgewing, daar geen eredienste by die kerkterrein sal plaasvind nie. Eredienste sal voorts op video, asook klank formaat beskikbaar gestel word. Gesinne, groeigroepe of individue kan by die huis aan hierdie eredienste deelneem. Digitale uitsendings sal op ons webblad (nggars.org.za), NG Garsfontein Facebook blad, Youtube kanaal, asook nuwe Whatsapp groep beskikbaar gestel word teen 09:00 op elke Sondag. Volledige skakels vir hierdie uitsendings sal later in die week gekommunikeer word.

Alhoewel die Corona-Virus ‘n uitdaging vir ons gemeente, in terme van enkele aspekte van ons gemeentebediening inhou, is ons daarvan oortuig dat hierdie uitdagende tye juis ‘n ideale geleentheid bied om ons roeping as liggaam van JESUS CHRISTUS uit te leef, en ook in ons omgang met hierdie pandemie die voorbeeld van JESUS te volg. Alhoewel ons vir ‘n kort tydjie verhinder mag word om soos ons daaraan gewoond is kerk toe te “gaan”, bied die Corona-Virus aan ons ‘n besondere geleentheid om kerk te “wees”.

Binne ‘n tyd wat die fokus op ons hand-higiëne geplaas word, wil ons gesonde, Bybelse hand-higiëne toepas – anders gestel: ons wil JESUS se hande wees. Hier is praktiese wyses waarop ons dit kan doen:

Hande wat bid

In Jakobus 5 word ons herinner aan die belangrikheid van gebed in uitdagende tye, en dat die gebed van gelowiges ‘n kragtige uitwerking het. As gemeente wil ons intree in gebed vir ons land en sy mense, en baie spesifiek vir elkeen wat reeds direk deur die Corona-Virus geraak word, asook vir ons dokters en mediese personeel. Ons gaan vir die komende tydperk weekliks gebedspunte kommunikeer, waarvoor ons as gemeente (hetsy individue, gesinne of groepe) kan bid.

Hande wat dien

Die kerk was nog altyd geroep om in krisistye, nie uit vrees in hulself te onttrek nie, maar juis uit liefde uit te reik na ander in nood – hierdie moet ook waar wees vir ons gemeente. As gemeente wil ons ons gemeenskap dien op die volgende wyses:

  • Deur te hou by die riglyne vir persoonlike higiëne, sodat ons nie ons eie, of ander se welstand in gedrang bring nie. Indien jy simptome toon, is dit beter om enige sosiale samekomste te vermy en dadelik die COVID-19 hulplyn-nommer te skakel: 0800 029 999.
  • Deur die skenking van hand-skoonmaak-middels, immuun-medikasie, handskoene en ander mediese hulpmiddels aan persone wat nie hiertoe toegang het nie, byvoorbeeld: hawelose persone, motorwagte, huishulpe, ensomeer.
  • Vanweë die skielike sluiting van die skole in ons omgewing, kan ons werkende lidmate help deur hul kinders op te pas.
  • Indien jou firma se werksaamhede ongedeerd kan voortgaan, kan jy persone wie se werk weens COVID-19 maatreëls gestaak is, in diens neem – eerder as om te “out-source”.
  • Bejaardesorg, veral in terme van hulp met inkopies en basiese benodighede, aangesien bejaardes deel van die hoë-risiko groep uitmaak.
  • Kontak asb. die kerkkantoor indien u op enige van hierdie of ander wyses kan help, of indien u hulp benodig.

Hande wat gee

Die tydelike afskaffing van eredienste hou finansiële uitdagings vir gemeentes en hul dienswerk in. Ons is ook daarvan bewus dat baie mense tans sonder inkomste is, vanweë die COVID-19 maatreëls, en dus finansiële ondersteuning benodig. Daarom versoek ons u om steeds voort te gaan om op een van die volgende wyses u weeklikse erediens-dankoffers, en enige finansiële bydraes te gee, sodat ons gemeente op volhoubare wyse met ons werksaamhede kan voortgaan en ander se nood kan help verlig.

Indien enige iemand hulp of ondersteuning benodig, kan julle gerus die kerkkantoor of enige van ons leraars kontak. As gemeente sal ons mekaar in hierdie tyd omarm, ondersteun en dien – saam met Christus en saam met mekaar sal ook hierdie stormagtige tye weer tot bedaring kom,

Tot dan – kom ons pas gesonde, geestelike hand-higiëne toe.

Baie liefde en groete

Dr. Gavin Meistre en Dr. Jaco Barnard

Spesiale reëlings rondom dienste tydens Paasnaweek word nog gefinaliseer en sal binnekort aan die gemeente gekommunikeer word.


God gebruik jou swakhede!

Ek en jy het swakhede. Jy is nie geskok oor hierdie wete nie, want jy is daagliks bewus daarvan. Dit gaan oor ons onvolmaakthede, ons beperkinge: fisies, emosioneel, intellektueel en geestelik. Daar is dalk onbeheerbare omstandighede wat my verswak en beperk. Maar die groot vraag is: wat doen ek en jy met ons swakhede? Jy kan dit wegsteek, dit ontken, verdedig, wrewel daaroor opbou. Dis wat baie mense doen, want ons is bang oor die reaksie van mense as hulle besef ek is nie so sterk in alles nie.

Maar God het ‘n ander perspektief op ons swakhede. Hy wil nie net ons sterkpunte gebruik nie, maar ook ons swakpunte tot sy eer (1 Kor 1:27). My swakhede is nie per ongeluk nie. God laat dit toe om sy krag deur my te openbaar. Hy word getrek na mense wat swak is en hul swakhede erken. Hy gebruik sulke mense op ‘n kragtige wyse. Dit is hoe Paulus sy doring in die vlees verstaan het.

Daar is ‘n beter opsie. In plaas daavan om dit weg te steek, kan ons dit erken en deel met ander. Nog beter, ons kan leer om te roem in ons swakhede. Vir God om jou op besondere wyse te gebruik, sal jy op ‘n manier “mank loop” vir die res van jou lewe. So is daar in elkeen van ons swakhede wat ons ons hele lewe lank met ons saamdra. Paulus bied vir ons ‘n besondere model oor die hantering van swakhede:

  1. Erken jou swakhede. As jy wil hê dat God jou moet gebruik, moet jy weet wie Hy is, maar ook wie jy is, met jou sterkpunte en swakpunte (Matt 16:16; Hand 14:15).
  2. Wees tevrede met jou swakhede. (2 Kor 12:9-10a). Dit leer ons om nederig te bly en afhanklik van God.
  3. Deel jou swakhede. Paulus was nie skaam om oor sy kwesbaarheid en weerloosheid te gesels nie. Hy praat eerlik oor sy mislukkings, gevoelens, frustrasies en vrese. (1 Kor 2:3).
  4. Roem in jou swakhede. 2 Kor 12:5b. Ons is ontvangers van genade. Ons roem op God se genade wat deur ons swakhede werk.

God gebruik swak mense. Hy sal jou ook gebruik. Hy gebruik jou nie ten spyte van jou swakhede nie, maar as gevolg daarvan.

Berei jouself voor om deur God gebruik te word deur eerlik te wees oor jou swakhede vandag.