Ons familie

Wie is ons

  • Garsfontein gemeente staan bekend as die gemeente in die stad met die groot hart. Ons streef daarna om ‘n plek te wees waar enigiemand dadelik welkom en tuis voel. Gesinne is vir ons belangrik en daarom bied ons verskeie bedieninge wat op die huisgesin gemik is – een ding is verseker: Hier by ons is daar plek vir oud en jonk! Kom word deel van ons familie in Christus – ons sien uit om jou te ontmoet.

Visie & Missie

  • Ons visie is: “Waar die stroom vloei daar is lewe”. Hierdie visie is gebaseer op Esegiël 47:1-9 wat lees: Die man met die meetstok het my teruggebring na die ingang van die tempel toe. Toe sien ek daar kom water onder die tempel se drumpel uit aan die oostekant. Die tempel het oos gekyk. Die water het regs van die tempel weggeloop, suid van die altaar verby. Die man vat my toe by die noordpoort uit en om na die buitenste oospoort toe. Daar syfer die water toe regs langs die poort uit. Die man het oos gestap en met die maatlyn wat hy by hom gehad het vyf honderd meter afgemeet van die oospoort af. Toe laat hy my deur die water loop. Dit was enkeldiep. Hy het nog vyf honderd meter afgemeet en my deur die water laat loop. Dit was kniediep. Hy het nog vyf honderd meter afgemeet en my deur die water laat loop. Dit het tot by my heupe gekom. Toe meet hy nog vyf honderd meter, maar toe was die water ‘n stroom waar ek nie kon deur nie. Die water was diep, sodat ‘n mens sou moes swem; dit was ‘n stroom waar ‘n mens nie deur kon loop nie. Die man sê toe vir my: “Sien jy dit, mens?” Hy laat my toe al langs die stroom terugstap. Terwyl ek so terugstap, sien ek daar staan groot, hoë bome weerskante op die stroom se wal. Die man het vir my gesê: “Hierdie water loop weg na die streek oos toe en af na die Jordaanvallei toe waar dit in die Dooie See sal inloop. Wanneer dit in die Dooie See inloop, sal die water van die Dooie See vars word. Waar die stroom ook kom, sal dit wemel van al die soorte diere en sal daar baie vis wees. Die water loop af na die Dooie See toe en sal die see vars maak.
    Waar die stroom kom, sal alles lewe.
    Ons wil ‘n gemeente wees wat, hier in die Ooste van Pretoria waar die Here ons geplaas het, in die spore van Jesus volg, deur die krag van die Heilige Gees, en waar ons ookal mag kom (by die huis, skool, Universiteit, aftree-oord, werkplek, winkelsentrum, ensovoorts) ‘n verskil maak in ander se lewe. Waar die stroom van God se liefde en genade vloei, daar sal lewe wees! Hiervoor roep die Here vir Garsfontein gemeente.

Matteus 4:18-20

  • Eendag toe Jesus langs die See van Galilea loop, sien Hy twee broers: Simon, wat ook Petrus genoem word, en sy broer Andreas. Hulle was besig om ‘n werpnet in die see uit te gooi, want hulle was vissers van beroep. Hy sê toe vir hulle: “Kom hier! Kom saam met My, en Ek sal julle vissers van mense maak.” Hulle het dadelik die nette gelos en Hom gevolg.

Waardes

  • Ons gemeente funksioneer volgens drie kernwaardes

Deur Christus: Jesus is die Een wat ons roep en in wie se voorbeeld ons wil volg! Jesus stap elke tree saam met ons. Ons wil liefhê soos Jesus liefhet, dien soos Hy gedien het, en loop waar Hy sou loop.

Met mekaar: Net soos Jesus die dissipels saam geroep en gestuur het, glo ons ook dat die Here ons nie een, een stuur na ander nie – as gemeente roep die Here ons om saam met mekaar ‘n verskil in ons gemeenskap en wêreld te maak.

Na die wêreld: Ons glo dat die Here ons roep na die wêreld, om ‘n verskil te maak in ander se lewe, en die evangelie van Jesus aan ander bekend te maak. Ons word geroep na ons onmiddelike gemeenskap, omliggende gemeenskappe en tot in die uithoeke van die aarde (Handelinge 1:8).